Taic dha Plana Gàidhlig Obar Dheathain

Bhòt comhairlichean ann an Obar Dheathain airson taic a chur ri plana Gàidhlig na comhairle.

Bha connspaid air nochdadh mun phlana ro-làimhe is cuid de chomairlichean ag ràdh gum bu chòir an t-airgead a chosg air gnothaichean eile.

Chuir an comhairliche Iain Yuill gluasad air adhart nuair a bha am plana ga dheasbad Diciadain.

Thuirt e gum bu chòir iarraidh air Riaghaltas na h-Alba sgìrean far a bheil glè bheag de dhualchas Ghàidhlig a shaoradh bho dhleasdanas plana Gàidhlig a dheasachadh.

Dh'iarr e gun rachadh dàil air plana Obar Dheathain san eadar-ama.

Cha deach gabhail ris a' ghluasad aige, is bhòt comhairlichean 32-9 gus am plana a chur troimhe.