Clàr-ola a' teannadh air an Loch a Tuath

Tha an clàr a' dèanamh a shlighe, mean air mean, timcheall air costa Leòdhais.

Tha an Transocean Winner a-nise a' teannadh air an Loch a Tuath is an turas aice timcheall Leòdhais gus tighinn gu ceann.

Chaidh an clàr-olà a shlaodadh far nan creagan aig Dail Mòr mu 10:00f oidhche Luain.

Thug an turas bhon uairsin nas fhaide na bha dùil.

Bha dòchas an toiseach gum biodh an clàr-ola san Loch a Tuath oidhche Mhàirt, is an uairsin gun ruigeadh i an loch mu 07:00m Diciadain.

Tha a h-uile coltas ann gur e staid a' chlàir as coireach nach deach a ghluasad cho luath 's a bha an luchd-sàbhalaidh ag iarraidh, is dragh ann gum faodadh i car a chur.

"Bodach"

Thuirt fear-naidheachd a' BhBC, Aonghas Dòmhnallach, a tha a' leantainn turas a' chlàir, gu bheil i coltach ri "bodach ri droch chruachain".

Tha am bàta-slaodadh ET Vittoria san Loch a Tuath is i a' cur sìos ochd acraichean a chumas an clàr.

Tòisichidh obair-rannsachaidh an uairsin air a' chlàr feuch dè cho dona 's a tha i air a milleadh.

Nochd ceist ùr mu thruailleadh, is aona sgiobair ag innse gun robh crùbagan a ghlac e air an gannrachadh le diesel.

Thuirt Transocean gum bu chòir dhan sgiobair fios a chur orra.