Clàr-ola ga sgrùdadh

Tha obair-sgrùdaidh a' tòiseachadh air an Transocean Winner is i a-nise aig acair san Loch a Tuath.

Ràinig an clàr an loch tràth feasgar Diciadain, às dèidh mar a chaidh a shlaodadh far nan creagan aig Dail Mòr oidhche Luain.

Chaidh ceithir acraichean a chur sìos san Loch a Tuath a chumas an clàr, is ceithir eile air an t-slighe.

Leis an doimhneachd a tha san Loch a Tuath, tha cothrom ann uidheamachd ROV agus daibhearan a chur fon chlàr.

Tha amharas air an luchd-salbhaidh gun deach milleadh a dhèanamh air a' chlàr nuair a chaidh i air tìr, agus nuair a bhathas ga shlaodadh far nan creagan.

Sgrùdadh

Innsidh an sgrùdadh an gabh milleadh sam bith a chàradh san uisge, no am feumar an Transocean Winner a ghluasad a-rithist gus an obair sin a dhèanamh.

Tha daoine fhathast air an casg bho thràigh an Dail Mhòir agus an sgìre timcheall air.

Thuirt oifigear an Riaghaltais, Uisdean Seathach, gu bheil e an dòchas an casg a thogail cho luath 's a tha deuchainnean sàbhailteachd air an dèanamh.

Tha casg cuideachd ann a-nise timcheall air a' chlàr-ola san Loch a Tuath.

Tha sgìre de chilemeatair mun cuairt a' chlàir air a thoirmeasg do shoithichean, ach gheibh bàtaichean a-mach is a-steach fhathast dha Cidhe Bhrèibhig is Cidhe Phort nan Giùran.

Bidh an Transocean Winner anns an Loch a Tuath 'son trì seachdainnean co-dhiù.