Stiùidio
Cha chluich seo air an uidheamachd agaibh

Naidheachdan 11:00m

1 An t-Sultain 2016 Ùraichte aig Ùraichte aig

Dealbhan Drabasta

Thuirt Poilis na h-Alba gun tàinig faisg air 2,000 cùis de dh'ìomhaighean drabasta cloinne dhan aire air an trì bliadhna mu dheireadh. Bha àrdachadh de 17% ann an-uiridh - an t-àrdachadh as motha aig sgìre poilis sam bith ann am Breatainn. Thuirt Comann Nàiseanta Dìon na Cloinne gum feum gu bheil e follaiseach gu bheil an trioblaid a' sìor fhàs, agus gum feum na Poilis agus companaidhean an eadar-lìn barrachd a dhèanamh mu dheidhinn.

Dòmhnall Trump

Thuirt Dòmhnall Trump, ma 's e an ath-Cheann-Suidhe air na Stàitean Aonaichte gun cuir e milleanan de luchd-imrich mhì-laghail a-mach às an dùthaich. Bha tagraiche nam Poblachdach a' bruidhinn ann an Arizona an-raoir goirid an dèidh dha tighinn à Meagsago far an do bhruidhinn e ri Ceann-Suidhe na dùthcha sin mu a phlana airson balla a thogail eadar Meagsago agus na Stàitean Aonaichte. Thuirt Mgr Trump gur ann air Meagsago a bhios cosgais a' bhalla sin, ach thuirt Meagsago nach pàigh iad dad dheth.

Apple

Thuirt àrd-oifigeach Apple, Tim Cook, gur e co-dhùnadh poileataigeach agus mì-chothromach dhan tàinig an Coimisean Eòrpach nuair a thuirt iad gum feum Apple £11bn de chìsean a phàigheadh air ais do Riaghaltas Phoblachd na h-Èireann. Dh'innis Mgr Cook dhan chraoladair Èireannach RTÉ gu bheil caothach air Apple leis a' bheachd gun do rinn iad dad mì-laghail, agus thuirt e gun deach an Coimisean Eòrpach ro fhada buileach an turas seo.

Ioran

Tha British Airways a' tòiseachadh air seirbheisean dìreach eadar Lunnainn agus Tehran a-rithist an-diugh airson a' chiad uair bho 2012. Tha seo an dèidh do Bhreatainn feadhainn de na casg-bhannan air Ioran a thogail anns a' Ghiblean am-bliadhna.

Col Uarach

Tha croitearan Chuil Uaraich ann an Leòdhas a' ceasnachadh seasamh laghail a' chonstabail a chuir Coimisean na Croitearachd an àite comataidh ionaltraidh a' bhaile. Dh'fhoillsich na croitearan pàipear a' freagairt cheistean a thog an constabal mun deidhinn, agus iad cuideachd a' fàgail air a' chonstabal nach do rinn e a chuid obrach fhèin mar a bu chòir dha.

Dùn Deòrsa

Tha an SNP ag ràdh gu bheil teagamh ann fhathast mu ghearastan an airm aig Dùn Deòrsa faisg air Inbhir Nis an dèidh litir bho Rùnaire na h-Alba, Dàibhidh Mundell, anns an tuirt e nach eil gealltanas sam bith ann gum fuirich an t-arm aig Gearastan Deòrsa. Tha fear de bhuill na sgìre ann am Pàrlamaid na h-Alba, Fearghas Ewing, ag ràdh nach eil an litir ach a' cur ris a' mhì-chinnt mun ghearastan.

Coilltean na h-Alba

Thòisich Riaghaltas na h-Alba conaltradh air stiùireadh gnìomhachas coille na h-Alba. Bheireadh am plana a th' aca làn-smachd air coilltearachd do Holyrood, le buidhinn ùir os cionn choilltean a bhuineas dhan Stàit, agus fearann poblach na h-Alba gu lèir. Thuirt a' bhuidheann a tha a' riochdachadh a' ghnìomhachas, Confor, gur e cothrom leasachaidh a tha seo do roinn air an tàinig fàs a leth-uimhir a-rithist bho 2008.