An Hawk san Loch a Tuath

Air fhoillseachadh
Tùs an deilbh, OHT
Fo-thiotal an deilbh, An OHT Hawk, a bheir an Transocean Winner air falbh.

Ràinig am bàta mòr an OHT Hawk Leòdhas is dòchas ann gum falbh e leis an Transocean Winner cho luath 's a ghabhas.

Bha an Hawk air a slighe a dhèanamh à Cromba, far an do dh'fhàg e clàr-ola eile.

Ràinig e an Loch a Tuath timcheall aig 8:00f oidhche Mhàirt.

Tha obair a-nise ga dèanamh an Transocean Winner a dheasachadh 'son a chur air an Hawk.

Chaidh sgrios a dhèanamh air a' chlàr nuair a chaidh e air na creagan aig Dàil Mòr air taobh siar Leòdhais.

Bha e air bristeadh air falbh bho bhàta-slaodaidh ann an stoirm.

Tha sin a' fàgail gu bheil pìos dhith a' laighe nas doimhne san uisge na an còrr dhith.

Fo-thiotal an deilbh, Chaidh an Transocean Winner air na creagan aig Dail Mòr san Lùnasdal.

Tha am pìos sin mu 12 meatair fon uisge, is feumar a thogail 4 meatairean mus tèid an clàr a chur air an Hawk.

Thèid na h-acraichean a tha a' cumail a' chlàir an uairsin a thoirt bhuaipe, is thèid a gluasad mu mhìle a-mach gu far am bi an Hawk a' feitheamh.

Thèid an Hawk a chur fodha san uisge, thèid an clàr a chur oirre, is èirichidh an Hawk a-rithist leis a caragò oirre.

Feumaidh an uairsin an clàr a cheangal air an deic, is mura gabh sin a dhèanamh san Loch a Tuath, thèid an Hawk sìos mu dhà no trì mìle deas air cala Steòrnabhaigh gus fasgadh fhaighinn.

Feumaidh an sgioba-saoraidh co-dhiù là gu leth de dh'aimsir shocair 'son an clàr a chur air an Hawk.

Bha dùil nach biodh cothrom air sin a' chiad ghreis.

Thathas an dòchas a-nise, ge-tà, oidhirp a dhèanamh eadar feasgar Disathairne agus Didòmhnaich, ma bhios an t-sìde fàbharach.

Ma thèid a h-uile sian mar a bu chòir, thèid an Transocean Winner a thogail air falbh, is a turas a Leòdhas gu bhith seachad.

Thèid a toirt dhan Tuirc, far an tèid a bhristeadh às a chèile.

Tuilleadh air an sgeulachd seo

Ceanglaichean Eadar-lìn Dàimheil

Chan eil am BBC an urra ri na tha air Làraichean-lìn air an taobh a-muigh