Stiùidio
Cha chluich seo air an uidheamachd agaibh

Naidheachdan 11:00m

17 An Dàmhair 2016 Ùraichte aig Ùraichte aig

Mosul

Thòisich iomairt le feachdan an Riaghaltais ann an Iorac, a' feuchainn ri smachd fhaighinn air baile Mosul an ceann a tuath na dùthcha. Tha am baile air a bhith ann an làmhan na Stàit Ioslamaich airson dà bhliadhna a-nis. Tha còrr air 30,000 saighdear an lùib na h-ionnsaigh, agus tha e coltach gu bheil na feachdan mar-thà air làmh-an-uachdair fhaighinn ann an cuid de bhailtean beaga timcheall air a' chathair-bhaile.

Aleppo

Thèid oidhirp eile a dhèanamh tron là an-diugh gus impidh a chur air an Ruis stad a chur air na h-ionnsaighean adhair air baile Aleppo ann an Siria. Bidh ministearan cèin an Aonaidh Eòrpaich a' deasbad na cùise aig coinneimh ann an Luxembourg nas fhaide den là. Tha na h-ionnsaighean leis an Ruis agus feachdan Shiria a' leantainn ged a tha na Stàitean Aonaichte agus an EU a' bagairt an tuilleadh smachd-bhannan a chur orra.

CLI Gàidhlig

Tha ceist ann mu na tha an dàn dhan bhuidhinn do luchd-ionnsachaidh, CLI Gàidhlig. Chaidh innse gun tèid faighneachd de bhallrachd na buidhne a bheil iad ag iarraidh a' bhuidheann a chur à bith. Chaidh stad a chur air maoineachadh na buidhne bho Bhòrd na Ghàidhlig nas tràithe air a' bhliadhna. Thuirt Alison Lang, a tha air a' bhòrd-stiùiridh, gur e briseadh-dùil uabhasach a th' ann dhaibh.

Calais

Chuir fear a bha na Àrd-Easbaig Chanterbury, Am Morair Williams, impidh air na h-ùghdarrasan barrachd a dhèanamh gus fògarraich òga a tha a' siubhal leotha fhèin a thoirt a Bhreatainn às an Fhraing, mus tèid sgrios a dhèanamh air campa fhògarrach Chalais. Tha an Fhraing airson 's gun tèid cur às dhan champa ro dheireadh na bliadhna sa. Tha dùil gun tig còrr air ceud fògarrach òg a Bhreatainn an t-seachdain sa, fo riaghailtean ùra eadar na dùthchannan.

Aiseagan

Tha coinneamh a' dol ann an Ìle madainn an-diugh airson deasbad a dhèanamh air seirbheisean-aiseig an eilein. Tha Comataidh Aiseig Chomhairle Coimhearsnachd Ìle agus Ball Earra-Ghàidheal ann am Pàrlamaid na h-Alba, Mìcheal Russell, a' bruidhinn ri riochdairean ChalMac mu mhì-thoileachas leis na h-aiseagan. Tha luchd-gnothaich ann an Ìle am measg na tha air a bhith a' gearan gun do dh'fhuiling iad call thairis air mìosan an t-samhraidh nuair a chaidh am bàta as àbhaist a bhith aca, am Finlaggan, a thoirt air falbh airson a cur air seirbeisean eile.

Taighean

Tha còrr air ceithir às gach deich neach ann am Breatainn a' fuireach ann an taighean nach eil air an comharrachadh mar math gu leòr, sin a rèir na buidhne cathrannais Shelter. Seo a' chiad sgrùdadh mòr a rinn iad air taighean na dùthcha bho chaidh an stèidheachadh leth-cheud bliadhna air ais. Fhuair an aithisg gu bheil faisg air an còigeamh cuid de dhaoine a' fuireach ann an taighean far a bheil trioblaidean ann le biastagan agus eile.