Naidheachdan 11:00m
Cha chluich seo air an uidheamachd agaibh

Naidheachdan 11:00m

7 An t-Samhain 2016 Ùraichte aig Ùraichte aig

Stèiseanan Poilis

Dh'fhaodadh stèiseanan poilis air feadh Alba dùnadh mar thoradh air ath-sgrùdadh a tha Poilis na h-Alba a' dèanamh air na togalaichean aca. Tha cuid air a bhith a' gearain nach d' fhuair coimhearsnachdan a-mach mun seo chun an-diugh.

Artaigil 50

Tha an Riaghaltas ag ràdh gum faodadh iad bhòt sam bith air Artaigil 50 a thoirt air adhart gus nach bi aca ri Bile a dhèanamh. Dh'fhaodadh Bile dàil mhòr a chur air planaichean a' Phrìomhaire airson an EU fhàgail. Chaidh a ràdh, an àite Bile, gum faodadh bhòt air Rùn a bhith ann, agus gun gabhadh sin a dhèanamh ann an aon là.

Obair Ola

Tha obair giollachd ola air tòiseachadh aig raon sa Chuan a Tuath a chaidh a lorg bho chionn còrr air 40 bliadhna. Thuirt Chevron gu bheil Pròiseact Alder air na ceudan obraichean a chruthachadh am Breatainn mar thà, nam measg feadhainn an Obar Dheathain agus an Inbhir Ghòrdain.

Taghadh Aimeireaga

Tha Dòmhnall Trump a' cumail a-mach gu bheil na h-ùghdarrasan a' taobhadh ri Hillary Clinton, às dèidh dhan FBI innse nach d' fhuair iad càil eucoireach anns na puist-dealain ùra a bha iad a' rannsachadh. Tha Mgr Trump ag ràdh nach robh dòigh ann a b' urrainn dhan FBI 650,000 post-d a sgrùdadh ann an ochd là. Thuirt na Deamocrataich gu bheil a' chùis air cron a dhèanamh air Hillary Clinton mar thà, agus gur dòcha gu bheil fios bhon FBI ro fhadalach airson feum a dhèanamh dhi.

Na h-Ìnnseachan

Cumaidh am Prìomhaire, Theresa May, còmhraidhean le Prìomhaire nan Ìnnseachan an-diugh. Bruidhnidh iad mu in-imrich, malairt is eile. Agus tha dòchas ann gum bruidhinn am Prìomhaire mu fhear à Earra-Ghàidheal a tha sa phrìosan ann an Chennai nuair a bhios iad a' coinneachadh. Tha teaghlach Bhilly Irving an dòchas gun dean i na 's urrainn dhi gus e fhèin agus còignear Bhreatannach eile fhaighinn dhachaigh.

Gabhsann

Chuir Urras Oighreachd Ghabhsainn ann an Leòdhas plana ùr 20 bliadhna air adhart dhan sgìre. Tha iad ag amas air na milleannan notaichean à cumhachd ath-nuadhachail a chur gu feum sa choimhearsnachd. Dh'fhoillsich iad gun tèid na grantaichean a gheibh daoine an-àirde. Faodaidh iarrtasan a-nis a bhith suas ri £5,000.

Sochairean

Tha riaghailtean ùra co-cheangailte ri sochairean gan cur an sàs an-diugh. Chan fhaigh gin de theaghlach barrachd air £20,000 a-nis. Thog dùbhlannaich agus buidhnean eaglaise draghan mun seo, ach tha an Riaghaltas ag ràdh gum brosnaich crìoch ùr nan sochairean daoine a dhol a dh'obair.