Naidheachdan 11:00m
Cha chluich seo air an uidheamachd agaibh

Naidheachdan 11:00m

17 An t-Samhain 2016 Ùraichte aig Ùraichte aig

Rannsachadh

Bheir an Leas-Phrìomh Mhinistear, Iain Swinney, fiosrachadh do Phàrlamaid na h-Alba an-diugh air an ìre aig a bheil an rannsachadh mu dhroch dhìol agus drabastachd an aghaidh cloinne ann an Alba. Tha an rannsachadh ag amas air clann a dh'fhulaing nuair a bha iad ann an cùram ach tha maill air a bhith ann, agus connspaid. Tha cuideam air Mgr Swinney tuilleadh farsaingeachd a thoirt dhan rannsachadh agus luchd-iomairt ag iarraidh air a leudachadh gu clubaichean, buidhnean òigridh agus paraistean eaglaise.

Bùthainnean

Tha am fiosrachadh as ùire ag ràdh gun do dh'èirich na chaidh a reic anns na bùthainnean air a' mhìos seo chaidh aig an ìre as àirde ann an 14 bliadhna. Thuirt Oifis na Staitistig Nàiseanta gun do chuidich aimsir fhuar bùthainnean a tha a' reic aodaich, agus gum faca bùthainnean eile buannachd bho na chaidh a reic de stuth airson Oidhche Shamhna.

Rabhadh

Thàinig rabhadh bho thè a tha iomadh bliadhna an sàs ann am foghlam Gàidhlig agus leasachadh coimhearsnachd nach bi anns a' Ghàidhlig ach cànan sgoilearachd mura dèan na buidhnean leasachaidh mòran a bharrachd anns na sgìrean anns a bheil daoine fhathast ga bruidhinn. Bha Anna NicSuain à Nis, an Leòdhas, a' bruidhinn an dèidh dhi a' phrìomh dhuais a thogail a-raoir aig Duaisean Mòra na Gàidhlig ann an Glaschu airson a cuid obrach ann am foghlam agus leasachadh coimhearsnachd.

Fògarraich

Tha bliadhna ann an-diugh, dhan là, bho laigh a' chiad phlèana ann an Glaschu le fògarraich à Siria. Tha Riaghaltas na h-Alba ag ràdh gun tàinig 1,200 dhiubh on uair sin. Sin an treas cuid de na thàinig dhan Rìoghachd Aonaichte gu lèir gu ruige seo.

Bann-leathann

Chaidh innse do chompanaidhean a' bhann-leathainn a bhith nas soilleire nuair a tha iad a' toirt seachad gealltanas mun astar aig am bi an t-eadar-lìon ag obair. Thuirt Ùghdarras Inbhe na Sanasachd nach eil an seòrsa sanasachd agus fiosrachadh a tha companaidhean a' toirt seachad idir soilleir agus gu bheil e doirbh do luchd-cleachdaidh a thuigsinn.

Aoineart

Tha muinntir Aoineart anns an Eilean Sgitheanach mì-thoilichte le plana na companaidh fòn-làimhe EE airson crann a thogail anns a' bhaile. Chan eil iad riaraichte leis an làraich a thagh EE agus iad ag ràdh gum bi an crann ro fhaisg air an rathad mhòr agus air taighean, gum mill e coltas an àite, agus gum biodh siognal nas fheàrr ann nan cuireadh iad air cnoc e.