Naidheachdan 11:00m
Cha chluich seo air an uidheamachd agaibh

Naidheachdan 11:00m

30 An Dàmhair 2019 Ùraichte aig Ùraichte aig

Clutha

Thuirt an aithisg oifigeil mu thubaist heileacoptair a' Chlutha nach biodh an tubaist air tachairt nam biodh am pìleat air na bu chòir dha a dhèanamh. Chaill deichnear am beatha nuair a thuit an heileacoptair poilis tro mhullach thaigh-seinnse a' Chlutha ann an Glaschu anns an t-Samhain ann an 2013 - an triùir a bh' anns an heileacoptair, agus seachdnar anns an taigh-sheinnse. Thuirt an t-Àrd-Shiorraidh, Craig Turnbull, a bha os cionn an rannsachaidh, gum bu chòir dhan phìleat a bhith air suidsichean nam pumpaichean connaidh a chur air, agus nach biodh na h-einnseanan air stad.

Tùr Ghrenfell

Tha a' chiad aithisg oifigeil air teine Tùr Ghrenfell ag ràdh gun do chuir poileasaidh ag iarraidh air luchd-còmhnaidh fuireach anns an togalach ri àireamh a' bhàis. Tha an aithisg a chaidh fhoillseachadh an-diugh ag iarraidh air an Riaghaltas molaidhean ùra ullachadh airson falbh à togalaichean àrda ann an èiginn. Thàinig i cuideachd dhan cho-dhùnadh nach robh an còmhdach a bh' air taobh a-muigh an togalaich a rèir riaghailtean togail, agus gur e sin a bu choireach gun do sgaoil an teine cho luath. Tha càineadh ann cuideachd air mar a làimhsich Seirbheis Smàlaidh Lunnainn an teine, anns an do chaill 72 dhuine am beatha.

Amber Rudd

Tha sean Rùnaire na Dùthcha, Amber Rudd, a' cur ris an àireimh de Bhuill-Phàrlamaid nach bi a' seasamh anns an taghadh coitcheann air an 12na là den Dùbhlachd. Dh'fhàg Ms Rudd an Caibineat agus i a' cur taic ris na buill Thòraidheach a chaill an Cuip nuair a chuir iad an aghaidh Bhrexit gun aonta. Thuirt i ge-tà, gu bheil i a' falbh le deagh chàirdeas eadar i agus Boris Johnson. Tha làn-dùil gun gabh Taigh nam Morairean an-diugh ri taghadh air an 12na là den Dùbhlachd, ris an do ghabh Taigh nan Cumantan an-raoir.

CalMac

Tha Comhairle nan Eilean Siar ag iarraidh air Caledonian Mac a' Bhriuthainn èisteachd ri muinntir nan eilean, agus ionnsachadh bho thrioblaidean nuair a tha bàtaichean-aiseig a' dol dhan doca. Tha a' Chomhairle ag ràdh gu bheil an dòigh sa bheil CalMac a' gluasad bhàtaichean eadar diofar shlighean nuair a tha soithichean eile san doca a' dèanamh thrioblaidean leis nach eil bàtaichean freagarrach aca nan àite.