आप्रवासीलाई युरोप छिर्न दिने टर्कीको चेतावनी

  • 25 नोभेम्बर 2016
शरणार्थी तस्वीर कपीराइट AFP

टर्कीका राष्ट्रपति रेजेप ताय्यिप एर्दोआनले युरोपेली संघ (इयु) ले दबाब दिएमा लाखौं आप्रवासीहरुका लागि टर्कीको सिमाना खुला गरिदिने चेतावनी दिएका छन्।

युरोपली संसदले वाध्यकारी नहुने गरी टर्कीको इयु सदस्यता विषयको छलफल स्थगित गर्ने पक्षमा मतदान गरेपछि उनले त्यसो भनेका हुन्।

गत जुलाई महिनामा भएको कूको असफल प्रयासप्रति धेरै कडा प्रतिक्रिया जनाइएकोमा त्यसो गरेको इयुले बताएको छ।

टर्कीमा गत जुलाई महिनामा भएको कूको असफल प्रयासप्रतिको धेरै कडा प्रतिकृयाका कारण युरोपेली संसदका सदस्यहरु चिन्तित भएका थिए।

आरोप

युरोप छिर्ने शरणार्थीको संख्या घटाउनका लागि गत मार्च महिनामा इयु र टर्कीबीच एउटा सहमति भएपछि ग्रीस पुग्ने शरणार्थीहरुको संख्या घटेको छ।

त्यो सहमति अन्तर्गत टर्कीलाई सहायता गरिने, टर्कीका नागरिकहरुलाई राहदानी विना यात्रा गर्न दिइने र इयु सदस्यताका बारेमा छलफल चाँडै अघि बढाइने बताइएको थियो।

एर्दोआनले इयुले ती वाचाहरु पुरा नगरेको आरोप लगाए।

धम्की

तस्वीर कपीराइट AP

जर्मन चान्सलर एंगेला मर्केलकी एकजना प्रवक्ताले त्यो सहमति सबै पक्षको हितमा भएको र कुनै पनि पक्षबाट दिइने धम्की सकारात्मक नहुने बताइन्।

इस्तान्बुलस्थित बीबीसी संवाददाता मार्क लोवेन भन्छन्, त्यस्तो धम्की टर्कीको अन्तिम हतियार हो र आक्रामक बन्दै गइरहेका एर्दोआन त्यो हतियार प्रयोग गर्न तयार देखिन्छन्।

उनको धम्कीले देखाएको छ कि युरोपलाई टर्कीको आवश्यकता भएको उनलाई थाहा छ र उनले युरोपेली संसदको मतलाई हलुका रुपमा लिने छैनन्।

निर्णय

वाध्यकारी नभएको त्यो निर्णय युरोपका नेताले पालना गर्ने सम्भावना कम छ, किनकि टर्की युरोपका लागि धेरै नै महत्वपूर्ण छ।

तर दुई पक्षबीचको तनाव भने चर्किरहेको छ र इयु र टर्कीबीचको सहमति अझै पनि नाजुक अवस्थामा देखिन्छ।

टर्कीले हाल झण्डै ३० लाख आप्रवासीहरुलाई शरण दिएको छ र ती मध्ये धेरैजसो सिरियाली छन्।

गत वर्ष टर्की हुँदै १० लाख भन्दा बढी शरणार्थीहरु युरोप पुगेका थिए।