खड्काको मुद्दा अब अख्तियारले अघि बढाउँछ: मन्त्री

  • 18 सेप्टेम्बर 2017
चितवन
Image caption निगमले चितवनमा खरीद गरेको जग्गा

केही समय यता आयल निगमले जग्गा खरीद गर्दा भएका भनिएका करोडौं रुपियाँका अनियमितताका निम्ति आरोपित कार्यकारी निर्देशक गोपालबहादुर खड्कालाई सोमबार मन्त्रिपरिषदले पदबाट बर्खास्त गरिदिएको छ।

"जग्गा खरीदमा भएका अनियमितताबारे सर्वत्र उठेका विषय, विभिन्न समितिहरुको प्रतिवेदन र मन्त्रालयको आफ्नै छानबिनबाट पनि गलत तरीकाबाट जग्गा खरीद गरिएको भनी देखिएको ठहरका आधारमा मन्त्रालयको ठाडो प्रस्तावमा उनलाई पदबाट हटाइएको छ," आपूर्तिमन्त्री शिवकुमार मण्डलले बीबीसीलाई बताए।

उनका अनुसार जग्गा खरीदकै विषयमा खड्का विरुद्ध अख्तियार दुरुपयोग अनुसन्धान आयोगमा मुद्दा रहेकाले अब बाँकी प्रक्रिया सोही मुद्दा बमोजिम अगाडी बढ्न सक्छ।

"मन्त्रिपरिषदले उनलाई पदमुक्त गरेको छ। उनी विरुद्ध अख्तियारमा मुद्दा जीवितै छ। यसको टुंगो लाग्न केही समय लाग्ला," मन्त्री मण्डलले बताए।

'म सहन्छु'

मन्त्रिपरिषदले बर्खास्त गरेको प्रति तीव्र असन्तुष्टी पोख्दै खड्काले आफू दोषी नभएको बताए।

बीबीसीसंग कुरा गर्दै उनले भने, "एउटा यस्तो मान्छे जसका विरुद्ध प्रमाण केही छैन तर खेदी खेदी यसरी सरकारले निलम्बन गर्न मिल्ने? यो देश यस्तै हो। यसैगरी चल्छ।"

नगरेको अपराधमा आरोप लगाएर कारवाही गरेको भन्दै उनले घोर आपत्ति रहेको बताए।

अब के गर्ने त? भन्ने प्रश्नको जवाफमा उनले भने, "केही नगर्ने। अब सहने। यो देशमा सहनुभन्दा के छ? भिमसेन थापालाई के गरे?"