जिम्बाब्वेको प्रसारक सेनाको ‘नियन्त्रण’मा

  • 15 नोभेम्बर 2017
सेना तस्वीर कपीराइट Reuters

जिम्बाब्वेमा सैनिकहरुले देशको राष्ट्रिय प्रसारक जेडबीसीको मुख्यालय नियन्त्रणमा लिएका विवरण आएका छन्।

राजधानी हरारेमा थप बख्तरबन्द गाडीहरु देखिएका छन्।

त्यसअघि दक्षिण अफ्रिकाका लागि जिम्बाब्वेका राजदूतले सैनिक 'कू' अर्थात् सत्तापलटको सम्भावना नरहेको बताएका थिए।

तर त्यहाँको सत्तारुढ दलले सेना प्रमुखले विद्रोहलाई बढावा दिएको आरोप लगाएको थियो।

हस्तक्षेप

जिम्बाब्वेको सेनाले देशको राजनीतिक कलह सुल्झाउन हस्तक्षेपको तयारी गरिरहेको बताएपछि त्यहाँको सत्तारुढ दलले देशका सेना प्रमुखले विद्रोहलाई बढावा दिएको आरोप लगाएको छ।

जानु पिएफ दलले जारी गरेको विज्ञप्तिले सेना प्रमुख कन्सट्यान्टिनो चिवेङ्गाको अभिव्यक्ति 'आश्चर्यजनक, आक्रोशपूर्ण र देशद्रोहको भावनाले प्रेरित' भएको टिप्पणी गरेको छ।

जिम्बाब्वेका ९३ वर्षीय राष्ट्रपति रोबर्ट मुगाबेले अहिलेसम्म कुनै प्रतिक्रिया दिएका छैनन्।

तस्वीर कपीराइट AFP
Image caption सेना प्रमुख कन्सट्यान्टिनो चिवेङ्गा

हरारेको बाहिरी क्षेत्रमा बख्तरबन्द सैनिक सवारीसाधन देखिए पनि दक्षिण अफ्रिकाका लागि जिम्बाब्वेका राजदूतले सत्तापलटको सम्भावना अस्वीकार गरेका थिए।

सोमबार सेना प्रमुख चिवेङ्गाले लामो समय युद्धमा सहभागी भएका पाका व्यक्तिहरुविरुद्ध निशाना साँध्ने काम बन्द हुनुपर्ने बताएका थिए।

धेरैले त्यसलाई देशका उपराष्ट्रपतिलाई अघिल्लो हप्ता पदबाट बर्खास्त गर्ने कदमप्रति संकेत गरिएका अभिव्यक्तिका रुपमा अर्थ्याएका छन्।