शीतकालीन ओलिम्पिक्स: रुसमाथि प्रतिबन्ध

  • 6 डिसेम्बर 2017
ओलिम्पिक्स रिङ तस्वीर कपीराइट Getty Images
Image caption दुई महिनापछि दक्षिण कोरियामा शीतकालीन ओलिम्पिक्स हुन गइरहेको छ।

अन्तर्राष्ट्रिय ओलिम्पिक समिति (आइओसी)ले शीतकालीन ओलिम्पिक्समा भाग लिनबाट प्रतिबन्ध लगाएपछि रुसमा आक्रोशयुक्त प्रतिक्रियाहरु व्यक्त भइरहेका छन्।

आइओसीको एउटा प्रतिवेदनले प्रतिबन्धित औषधीको प्रयोग नियन्त्रण सम्बन्धी प्रणालीलाई रुसले अभूतपूर्व र व्यवस्थित ढङ्गले मिचिरहेको देखाएको थियो।

रुसी ओलिम्पिक कमिटिले उक्त प्रतिबन्धविरुद्ध पुनरावेदन दिने बताएको छ।

पूर्व खेलकुदमन्त्री समेत रहेका रुसी उपप्रधानमन्त्री भिटाली मुट्कोलाई आजीवन प्रतिबन्ध लगाइएको छ।

प्रतिक्रिया

समाजिक सञ्जालमा आक्रोश व्यक्त गर्दै रुसी विदेशमन्त्रालयकी प्रवक्ताले विश्व युद्ध, सोभियत संघको विघटन र कैयौँ प्रतिबन्धबाट बाँचेर अघि बढेको रुसलाई अहिले पनि केही फरक नपर्ने बताएकी छन्।

तस्वीर कपीराइट Getty Images

संसदका उपसभामुखले उक्त प्रतिबन्धलाई अपमान र बेइज्जतीको संज्ञा दिएका छन्।

उपसभामुख पिओ टोल्स्टोयले भनेका छन्, "उनीहरुको शर्त तिमीहरु पश्चाताप गर र हामी सोच्नसक्छौँ, सम्भवत अबको आठ वर्षपछि तिमीहरुलाई माफी दिन सक्छौँ भन्ने छ। हामी कुनै पनि हालतमा घुँडा टेक्ने छैनौँ।"

रुसको सोचीमा सन् २०१४ मा भएको शीतकालीन ओलिम्पिक्सका क्रममा राज्यको संलग्नतामा 'डोपिङ' भएको आरोपमाथि अनुसन्धान भएपछि यो निर्णय लिइएको बताइएको छ।

आइओसीले भनेको छ, "यो निर्णयले नराम्रो प्रवृत्तिप्रति एउटा रेखा कोरिदिएको छ।"

यो निर्णयको रुसमा भर्त्सना गरिएको छ केही राजनीतिकर्मीले खेलबाट बाहिरिनुपर्ने बताएका छन्।

तर केहीले भने स्वच्छ खेलाडीहरुले सहभागी हुन पाउने मौकाको स्वागत गरेका छन्।

विकल्प

बीबीसीका मस्को संवाददाता स्टीभन रोजनबर्ग भन्छन् प्रख्यात स्केटिङ प्रशिक्षक टाट्याना टारासोभाले त्यसलाई "रुसी राष्ट्रिय खेलकुदको हत्या" भनेकी छन्।

रुसलाई दक्षिण कोरियामा हुने ओलिम्पिक्समा प्रतिस्पर्धा गर्न प्रतिबन्ध लगाइएको भएपनि आफूलाई स्वच्छ प्रमाणित गर्नसक्ने रुसी खेलाडीहरु भने ओलिम्पिक्स झण्डामुनि सहभागी बन्न अनुमति दिइएको छ।

तर क्रेमलिनले उनीहरुलाई सहभागी बन्न देला? राष्ट्रपति भ्लादिमिर पुटिनले यस अघि यस्तो अवस्था आइपर्दा देशलाई अपमान गरिएको भनेका थिए।

अहिलेको प्रतिबन्धप्रति केही समयपछि उनले प्रतिक्रिया दिने ठानिएको छ।

बीबीसीका खेल सम्पादक ड्यान रोएन भन्छन्, रुसको बहिर्गमन हुने गरी दिइएको दण्ड ओलिम्पिक इतिहासमै अभूतपूर्व छ।

उनका अनुसार यस अघि कहिल्यै पनि झेली गरेको र प्रतिबन्धित औषधीको प्रयोग गरेका कारण रुसले प्राप्त गरेको भनिएको अनुपातको फाइदा पाएका कुनै पनि देशलाई प्रतिबन्ध लगाइएको थिएन।

सम्बन्धित सामग्री