मेलबर्नमा कार जोताइँदा १४ घाइते

  • 21 डिसेम्बर 2017
घटनास्थल तस्वीर कपीराइट Reuters

अष्ट्रेलियाको मेलबर्न शहरमा रहेको एक व्यस्त चोकमा मानिसहरुको भीडमा जानीजानी एउटा कार जोताइँदा कम्तीमा १४ जना घाइते भएका छन्।

सो कार भीडमा जोताएको आरोपमा प्रहरीले दुई जनालाई पक्राउ गरेको छ। पक्राउ पर्नेमा सो कारका चालक र अर्का एक पुरुष छन्।

भिक्टोरिया प्रहरीका अनुसार शहरको मध्यभागमा रहेको एक व्यस्त सडक फ्लिन्डर्स स्ट्रिटमा सो कार कैयौँ मानिसहरुको भीडमा लगेर ठोक्काइएको हो।

प्रहरीका एक प्रवक्ता रुसेल बारेटले हिरासतमा लिइएका ती चालक अफगानी मूलका अष्ट्रेलियाली नागरिक भएको बताएका छन्।

उनले लागू ‍औषधको प्रयोग गर्ने गरेको र उनमा 'मानसिक समस्या' रहेको बताए।

'अनुसन्धान'

सो घटनाको दृष्य कैद गरिरहेका अर्का व्यक्तिले चक्कुहरुले भरिएको झोला बोकिरहेका थिए।

बारेटले सो घटना जानीजानी गराइएको विश्वास आफूहरुलाई लागेको र त्यो आतंकवादसँग सम्बन्धित घटना भए-नभएको भनेर टिप्पणी गर्न एकदम चाँडो हुने बताए।

घटनाको उद्देश्यबारे अनुसन्धान भइरहेको प्रहरीले बताएको छ।

एक बच्चासहित घाइतेमध्ये केहीको अवस्था गम्भीर रहेको बताइएको छ।

सामाजिक संजालको वेबसाईट ट्वीटरमा एक सन्देश लेख्दै अष्ट्रेलियाका प्रधानमन्त्री माल्कम टर्नबुलले घटनाबारे अनुसन्धान शुरु भएको बताउँदै घाइते र तीनका परिवारजनप्रति सहानुभूति प्रकट गरेका छन्।