भावी मुख्यमन्त्रीका अनुहार

मुख्यमन्त्रीहरु

तस्बिर स्रोत, facebook

सात प्रदेशमध्ये छवटामा सरकारको नेतृत्व गर्ने पक्कापक्की देखिएका दलहरुले मुख्यमन्त्रीका प्रत्यासी चुनेका छन्।

प्रदेश ४ मा सरकारको नेतृत्व गर्ने निश्चित देखिए पनि एमालेले त्यहाँ कसलाई उक्त जिम्मेवारी दिने भन्नेबारे टुंगो लगाउन सकेको छैन।

शुक्रवार एमालेले आन्तरिक चुनावबाट प्रदेश १ को संसदीय दलको रुपमा शेरधन राईलाई चयन गरेको छ।

प्रदेश संसदीय दलमा भएको चुनावमा राईले २६ र प्रतिस्पर्धी भीम आचार्यले २४ मत पाए भने एक मत बदर भएको थियो।

प्रतिस्पर्धा

प्रदेश ३ मा एमाले संसदीय दलको नेताको रुपमा डोरमणि पौडेल निर्वाचित भएका छन्।

योसँगै उनलाई प्रदेश ३ को मुख्यमन्त्री बन्ने बाटो खुलेको छ।

उनले अष्टलक्ष्मी शाक्यलाई पराजित गरेका हुन्।

राजेन्द्र पाण्डे चुनावी मैदानबाट बाहिरिएपछि पौडेल र शाक्यबीच प्रतिस्पर्धा भएको थियो।

प्रदेश ५ मा यसअघि नै एमाले संसदीय दलले शंकर पोखरेललाई सहमतिमै नेता चयन गरिसकेको छ।

प्रदेश २ मा सरकारको नेतृत्वको दावी गरिरहेको संघीय समाजवादी फोरमले मोहम्मद लालबाबु राउत गद्दीलाई नेता चयन गरिसकेको छ।

सिफारिस

प्रदेश ६ मा माओवादी केन्द्रका महेन्द्रबहादुर शाही पार्टीको संसदीय दलको नेता चुनिइसकेका छन्।

वाम गठबन्धनको भागवण्डा अनुसार प्रदेश ६ मा मुख्यमन्त्री माओवादी केन्द्रलाई दिन एमालेले सहमति जनाइसकेको छ।

प्रदेश ७ को पार्टी कमिटीले माओवादी केन्द्रका संसदीय दलको नेताको रुपमा त्रिलोचन भट्टको नाम सिफारिस गरेको छ।

त्यहाँ पनि मुख्यमन्त्री माओवादी केन्द्रबाट हुने सहमति वाम गठबन्धनमा भइसकेको छ।

तस्बिर स्रोत, facebook

तस्बिरको क्याप्शन,

प्रदेश ४ मा किरण गुरुङ र पृथ्वी सुब्बा गुरुङ मुख्यमन्त्रीको आकांक्षी देखिएका छन्

प्रदेश ४ मा मुख्यमन्त्री एमालेले लिने सहमति भएपनि कसलाई पठाउने भन्नेबारे एमालेले टुंग्याइसकेको छैन।

पृथ्वी सुब्बा गुरुङ र किरण गुरुङ मुख्यमन्त्रीका आकांक्षी देखिएका छन्।