'किम जङ अनसँग भेट्न ट्रम्प सहमत'

  • 9 मार्च 2018
उत्तर कोरिया तस्वीर कपीराइट Reuters

अमेरिकी राष्ट्रपति डोनल्ड ट्रम्प उत्तर कोरियाली नेता किम जङ अनसँग भेट्न सहमत भएको बताइएको छ।

यो हप्ता अमेरिकी र उत्तर कोरियाली नेताहरूसँग भेटवार्ता गरेको दक्षिण कोरियाली समूहका नेताले किमले थप पारमाणविक र क्षेप्यास्त्र परीक्षण नगर्ने प्रस्ताव गरेको बताएका छन्।

दक्षिण कोरियाली दूत चुन यु योङले राष्ट्रपति ट्रम्पको सम्झौता नगर्ने प्रतिबद्धताले उत्तर कोरियामाथि दबाब बढाएको भन्दै प्रशंसा गरे।

केही समय अघिसम्म ती दुई नेताहरू सार्वजनिक रूपमा व्यक्तिगत आरोपप्रत्यारोपमा उत्रिएका थिए।

अप्रत्याशित

उक्त अप्रत्याशित घोषणा उत्तर कोरियाली नेताको पत्र लिएर वाशिङ्टन पुगेका दक्षिण कोरियाका उच्चपदस्थ अधिकारीहरूले गरेका थिए।

दक्षिण कोरियाली अधिकारीहरूका अनुसार किमले पारमाणविक र क्षेप्यास्त्र परीक्षणहरू स्थगन गर्न सहमति जनाएका छन् र पारमावणिक नि:शस्त्रीकरणका लागि प्रतिबद्धता पनि जनाएका छन्।

पछिल्लो घटनाक्रम महिनौँ यताका चेतावनी र हिंसापछिको एउटा महत्त्वपूर्ण प्रगति जस्तो देखिन्छ।

उत्तर कोरिया विरुद्ध 'कडा नाकाबन्दी'

‘नयाँ क्षेप्यास्त्र अमेरिकाभर पुग्नसक्छ’

दक्षिण कोरियाली प्रतिनिधिमण्डलले अघिल्लो साता प्योङ्याङमा उत्तर कोरियाली नेतासँग अभूतपूर्व प्रकृतिको वार्ता गरेको थियो।

वार्ता

राष्ट्रिय सुरक्षा सल्लाहाकार चुन यु योङले ह्वाइट हाउस बाहिर सम्वादाताहरूसँग कुरा गर्दै दुई नेताले आगामी मे महिनामा वार्ता गर्ने अपेक्षा गरेको बताए।

उनले उत्तर कोरियाली नेताले आफूहरूसँगको भेटमा पारमाणविक निश:स्त्रीकरणप्रति प्रतिबद्धता जनाएको आफूले राष्ट्रपति ट्रम्पलाई जानकारी दिएको बताए।

उक्त 'विफ्रिङ'को प्रशंसा गर्दै ट्रम्पले स्थायी रूपमा उत्तर कोरियालाई पारमाणविक अस्त्रबाट नि:शस्त्र बनाउने उद्देश्य लिएर आफूले मे महिनामा किम जङ अनलाई भेट्ने बताएको योङले जानकारी दिए।

दुवै कोरियाले संयुक्त रूपमा हिउँदे ओलिम्पिक्समा सहभागिता जनाएपछि दुई कोरियाबीचको सम्बन्धमा सुधार आएको छ।

तर आलोचकहरूले उत्तर कोरियाको प्रतिबद्धतालाई शंकाको घेरामा राख्ने गरेका छन।