अमेरिका-दक्षिण कोरियाको संयुक्त सैन्य अभ्यास अप्रिल १ मा

  • 20 मार्च 2018
कोरिया-अमेरिका सैनिक तस्वीर कपीराइट Getty Images

संयुक्त राज्य अमेरिका र दक्षिण कोरियाले एप्रिल १ मा आफ्ना सेनाहरूले ठूलो स्तरको सैन्य अभ्यास गर्ने घोषणा गरेका छन्।

उत्तर कोरियाले अतिक्रमणको तयारीको रूपमा हेर्ने गरेका बेला सैन्य अभ्यास कोरियाली प्रायद्वीपमा एउटा मुख्य विवादको विषय रहिआएको छ।

शीतकालीन ओलिम्पिक्सका बेला कूटनीतिक सम्बन्धमा देखिएको न्यायोपनका माझ मार्चमा शुरू हुने भनिएको संयुक्त सैन्य अभ्यास रोकिएको थियो।

सैन्य अभ्यासमा तीन लाखभन्दा बढी सैनिकहरू र ठूलो मात्रामा सैन्य स्रोत र साधनको परिचालन गरिनेछ।

प्रयत्न

कोरियाली प्रायद्वीपमा तनाव कम गर्ने दिशामा कूटनीतिक प्रयत्नहरू जारी रहेका बेला अप्रत्यासित रूपमा सैन्य अभ्यास गरिने घोषणा गरिएको हो।

यसै महिनाको शुरूतिर अमेरिकी राष्ट्रपति डोनल्ड ट्रम्पले अनपेक्षित रूपमा प्रत्यक्ष वार्ताका लागि उत्तर कोरियाली नेता किम जङ-अनको निम्तो स्वीकारेका थिए।

उत्तर कोरियाले आफ्नो पारमाणविक कार्यक्रम त्याग्न पनि 'प्रतिबद्ध' रहेको बताएको थियो।

त्यसबारे थप विवरणहरू चाहिँ सार्वजनिक भएको छैन र उत्तर कोरियाले अहिलेसम्म सिधै प्रतिक्रिया जनाइसकेको छैन।

वार्तास्थल

यदि वार्ता भए पदासीन अमेरिकी राष्ट्रपतिले उत्तर कोरियाली नेतालाई भेटेको पहिलो पटक हुनेछ।

सम्भावित वार्तास्थलबारे कुराकानीका लागि उत्तर कोरियाली विदेशमन्त्री यसै हप्ताको शुरूतिर स्वीडेन पुगेका थिए।

त्यहाँ उनले वार्ताका लागि तयारी गरेको व्यापक रूपमा अनुमान गरिएको थियो।

अमेरिका र दक्षिण कोरियाले आफूहरूमाथि बाह्य आक्रमण गरिएको अवस्थामा त्यसको सामना गर्नका निम्ति संयुक्त सैन्य अभ्यास आवश्यक रहेको बताउने गरेका छन्।

सम्बन्धित समाचार