क्यानडा: भ्यानले जोतेर १० को हत्या

  • 24 एप्रिल 2018
क्यानडा तस्वीर कपीराइट Getty Images

क्यानडाको टोरन्टोका एक व्यक्तिले भाडामा लिइएको भ्यान पैदल यात्रु हिँड्ने व्यस्त मार्गमा योजनाबद्ध रूपमा गुडाएपछि कम्तीमा १० जना मारिएका छन्।

उक्त भ्यानले ठक्कर दिएका अन्य १५ जना घाइते भएका छन्।

प्रत्यक्षदर्शीले ती चालकले पैदलमार्गमा तीव्र गतिमा भ्यानलाई जोताएको र त्यसपछि कैयौं पटक सडकमा र पैदलमार्गमा ल्याउने लैजाने गरेको उल्लेख गरेका छन्।

सन्दिग्ध चालकलाई पक्राउ गरिएको छ।

ठक्कर

दिउँसोको खाना खाने समयमा सेतो रंगको उक्त भ्यानले पैदल यात्रुले भरिएको उत्तरी टोरन्टोको बाहिरी क्षेत्रमा पैदलमार्गमा चढेर मानिसहरूलाई ठक्कर दिएको थियो।

तस्वीर कपीराइट AFP

प्रत्यक्षदर्शीहरूले उक्त भ्यान तीव्र गतिमा हुइकिँदै अघि बढेको र मानिसहरू चिच्याएको आवाज सुनिएको जनाएका छन्।

उक्त भ्यानले बारम्बार सडक र पैदलमार्गमा आउने जाने गरेको थियो।

तनावपूर्ण अवस्था भए पनि प्रहरीले गोली नचलाई भ्यानका चालकलाई पक्राउ गरी हिरासतमा लिएका छन्।

टोरन्टोका मेयरले धैर्यता देखाउन मानिसहरूलाई अपिल गरेका छन्।

जी सेभेन

अधिकारीहरूले यसलाई योजनाबद्ध हमला भनेका छन्।

तस्वीर कपीराइट Reuters

विश्वका ठूला अर्थतन्त्र भएका जी सेभेन आवद्ध देशका विदेशमन्त्रीहरूको बैठक चलिरहेको टोरन्टोको मूख्य क्षेत्र भन्दा १८ माइल टाढा यो घटना भएको हो।

हालसम्म उक्त बैठक र भ्यान चालकका गतिविधिबीच केही सम्बन्ध रहे नरहेको पुष्टि भएको छैन।

विश्वका अन्य भागमा इस्लामिक स्टेट समूहले यस्तै प्रकृतिका हमला गराउने गरेका छन्। तर पछिल्लो घटनाको उद्देश्य अझै स्पष्ट छैन।

सम्बन्धित सामग्री