रकम लेनदेनबारेको कुराकानी 'रेकर्ड'

  • 21 जुलाई 2018
पूर्व मोडल तस्वीर कपीराइट Getty Images

अमेरिकी राष्ट्रपति डोनल्ड ट्रम्पले प्लेब्वाइ म्यागजिनकी पूर्वमोडेललाई दिने रकमबारे गरेको छलफललाई गोप्य रुपमा रेकर्ड गरिएको अमेरिकी सञ्चारमाध्यमहरूले जनाएका छन्।

त्यस्ता रेकर्डहरू यो वर्षको शुरूमा संघीय अनुसन्धान निकाय एफबीआइले ट्रम्पका पूर्ववकिल माइकल कोअनको कार्यालयमा छापा मार्दा फेला परेको बताइएको छ।

न्यूयोर्क टाइम्सले उक्त रेकर्डिङमा ट्रम्प र कोअनले क्यारेन मक्डुगललाई रकम तिर्ने विषयमा छलफल गरिरहेका छन्, जोसँग ट्रम्पको सम्बन्ध थियो।

सन् २०१६ को राष्ट्रपतीय चुनावअघि उक्त टेप रेकर्ड गरिएको थियो।

छानबिन

न्याय मन्त्रालयले ट्रम्पसँग आफ्नो सम्बन्ध रहेको दाबी गर्ने ती महिलालाई तिरिएको रकमबारे छानबिन गरिरहेको जनाएको छ।

अभियोग नलगाइएका कोअनमाथि निर्वाचन कानूनको उल्लंघन गरेको र ब्याङ्क र कर छली अन्तर्गत अनुसन्धान भइरहेका खबर आएका छन्।

'ट्रम्प केटाकेटी जस्ता छन्'

वयस्क अभिनेत्रीलाई 'ट्रम्पबारे नबोल्न धम्की'

सन् २०१६ को राष्ट्रपतीय चुनावका बेला मक्डुगलले आफ्नो कथा न्याशनल इनक्वाइररलाई बेचेकी थिइन्, जुन ट्रम्पका साथीको हो।

तस्वीर कपीराइट Getty Images

१ लाख ५० हजार डलरको सम्झौताले उक्त पत्रिकालाई ट्याब्लोइड कथा छाप्ने अधिकार दिएको थियो र मक्डुगललाई भने आफ्नो ट्रम्पसँग रहेको भनिएको सम्बन्धलाई सार्वजनिक रुपमा भन्न प्रतिबन्ध लगाइएको थियो।

ट्रम्पसँग सम्बन्ध

शुक्रवार ट्रम्पका हालका वकिल रुडी जुलियानीले न्यूयोर्क टाइम्सलाई राष्ट्रपति र कनबीच मक्डुगललाई पैसा दिनेबारे छलफल भएको बताएका हुन्।

तर पैसा भने कहिल्यै पनि नपठाइएको र ट्रम्पले कुनै गल्ती नगरेको उनले बताएका छन्।

वाल स्ट्रिट जर्नलले सन् २०१६ को सेप्टेम्बरमा भएको उक्त संवादको रेकर्ड फोनमा नभइ व्यक्तिगत भेटघाटमा भएको र त्यो केवल दुई मिनेट नपुग्दै काटिएको जनाएको छ।

मक्डुगलले ट्रम्पसँग उनले मेलानिया ट्रम्पसँग विवाह भएको एक वर्षपछि सन् २००६ मा १० महिना सम्बन्ध भएको बताएकी छन्।