एसईई: सांसद शान्ता चौधरी र अभिनेत्री करिश्मा मानन्धर पनि परीक्षा दिँदै

  • 24 मार्च 2019
तस्वीर कपीराइट RSS

इच्छा भए उमेरले शिक्षाको भोकलाई रोक्दैन भन्ने अभिनेत्री करिश्मा मानन्धर र सांसद शान्ता चौधरीले प्रमाणित गरेका छन्।

उनीहरूजस्तै अरू व्यक्ति पनि देशका विभिन्न स्थानमा आइतवारबाट सुरु भएको एसईई परीक्षामा सहभागी भएका छन्। तर अधिकांश परीक्षार्थीहरू भने किशोरावस्थाका छन्।

परीक्षा नियन्त्रण कार्यालयका अनुसार २०७५ सालको एसईई परीक्षामा नेपालभरि कुल चार लाख ७५ हजार तीन जना परीक्षार्थी सहभागी छन्। त्यसमध्ये छात्राको सङ्ख्या केही बढी छ।

सङ्घीय संरचनाअन्तर्गत पहिलो पटक यो परीक्षा हुँदैछ। देशभरि १९ सय ६९ वटा परीक्षाकेन्द्र तोकिएको छ।

परीक्षाका लागि विशेष सुरक्षाको व्यवस्था मिलाइएको छ।

पहिलो दिन अनिवार्य अङ्ग्रेजी विषयको परीक्षा सकिएको छ।

सङ्घर्षको कथा

करिश्मा मानन्धरले सानै उमेरदेखि नेपाली चलचित्रमा अभिनय गर्न थालिन्। शान्ता चौधरी पहिला कमलरी थिइन् र १८ वर्ष अर्काको घरमा काम गरेर बस्न बाध्य भइनन्।

उनीहरूको सङ्घर्षको कथामा एउटा समानता छ - विभिन्न कारणले उमेर हुँदा उनीहरूले पढ्न पाएनन्।

तस्वीर कपीराइट RSS

अहिले उनीहरू दुवै राजनीतिमा सक्रिय छन्। राजनीतिबाट समाज फेर्न सकिन्छ भन्ने उनीहरूको मान्यता छ।

चौधरी प्रतिनिधिसभाकी सांसद हुन् भने मानन्धर नयाँ शक्ति पार्टीकी केन्द्रीय नेत्री।

तर औपचारिक शिक्षाको भोकले उनीहरूलाई विद्यालयतिर डोर्‍यायो।

Students taking SEE
RSS
कुल परीक्षार्थी‍ ४,७५,००३

  • छात्राको सङ्ख्या २,३८,५५८

  • छात्रको सङ्ख्या२,३६,४४५

Source: परीक्षा नियन्त्रण कार्यालय

आइतवारदेखि सुरु भएको माध्यमिक शिक्षाको अन्तिम परीक्षा एसईईमा उनीहरू अरू विद्यार्थीसरह नै सहभागी भएका छन्।

आफू पढ्ने विद्यालयको पोसाक लगाएरै मानन्धर काठमाण्डू डिल्लीबजारस्थित विजयस्मारक विद्यालयमा अङ्ग्रेजी विषयको परीक्षा दिन पुगिन्।

गोदावरीस्थित आफ्नो घरबाट आफैँ गाडी हाँकेर उनी परीक्षा दिन पुगेको बताइएको छ।

'महत्त्वपूर्ण दिन'

चौधरी भने दाङको तुलसीपुरस्थित एउटा विद्यालयको केन्द्रबाट परीक्षा दिँदैछिन्।

तस्वीर कपीराइट RSS
Image caption भक्तपुरको गट्ठाघरमा परीक्षा दिँदै एक महिला

परीक्षा आरम्भ हुनुभन्दा अगाडि चौधरीले भनिन्, "बाल्यकालदेखिको जुन रहर थियो त्यो पूरा गर्दैछु। ...पढाइको महत्त्व मेरा लागि खट्किन्थ्यो।"

"अहिले आएर यो उमेरमा पढ्दैछु र आज एसईई परीक्षा पनि दिँदैछु। आजको दिन मेरा लागि निकै महत्त्वपूर्ण दिन हो भन्ने मैले महसुस गरेकी छु।"

मानन्धर र चौधरी एसईईमा सहभागी भएको विषयले सामाजिक सञ्जालमा पनि चर्चा पायो।

उनीहरूले पाएको चर्चाप्रति केहीले व्यङ्ग्यात्मक टिप्पणी गरेका छन्।

सात प्रदेशमध्ये सबैभन्दा बढी परीक्षार्थी प्रदेश नं. ३ मा र सबैभन्दा कम कर्णाली प्रदेशमा रहेको परीक्षा नियन्त्रण कार्यालयले जनाएको छ।

कुन प्रदेशमा कति परीक्षार्थी

प्रदेश नं १ ८३,६१८
प्रदेश नं. २ ७०,५१८
प्रदेश नं. ३ १,०६,००२
गण्डकी प्रदेश ४८,०६३
प्रदेश नं. ५ ७६,९८३
कर्णाली प्रदेश ३५,६३४
सुदूरपश्चिम प्रदेश ५३,९७२

गत साता हामीले मानन्धरसँग भेटेर एसईईको तयारीबारे कुरा गरेका थियौँ। कसरी तयारी गरेकी छन् त उनले परीक्षाको तयारी?

हेर्नुहोस् यो भिडिओ।

तपाईंको उपकरणमा मिडिया प्लेब्याक सपोर्ट छैन
करिश्मा मानन्धरको एसईई तपस्या

सम्बन्धित सामग्री