सगरमाथा आरोहण: कामिरिता शेर्पा २३औं पटक शिखरमा पुगेर नयाँ कीर्तिमान कायम

  • 15 मे 2019
Kamirita Sherpa तस्वीर कपीराइट Seven Summit Treks

‍कामिरिता शेर्पाले २३औं पटक सगरमाथा आरोहण गरेर नयाँ विश्व कीर्तिमान राखेका छन्।

सोलुखुम्बुको थामे गाउँका ४९ वर्षिय कामिरिताले आफ्नै नाममा रहेको सर्वाधिक पटक विश्वको सर्वोच्च शिखर आरोहण गर्ने कीर्तिमान सुधार गरेका हुन्।

"कामिरिता शेर्पा र निमा ओङ्दी शेर्पा बिहान ७:५० बजे सगरमाथाको शिखरमा पुगेका छन्," आधार शिविरबाट पर्यटन विभागकी निर्देशक मीरा आचार्यले बताइन्।

उनको आरोहण कम्पनी सेभेन समिट्स ट्रेक्सका टासी लाक्पा शेर्पाले आरोहणको पुष्टि गर्दै 'यो राष्ट्रकै गौरवको कुरा' भएको बताएका छन्।

कतिपटक चढ्ने?

सन् १९९४ मा पहिलो पटक सगरमाथाको आरोहण गरेका शेर्पाले २५ पटक चुचुरोमा टेकेपछि विश्राम लिने बताएका छन्।

आरोहणमा जानुअघि बीबीसीसँग कुराकानी गर्दै कामिरिताले तत्काल हिमाल चढ्न नछोड्ने बताएका थिए।

तपाईंको उपकरणमा मिडिया प्लेब्याक सपोर्ट छैन
‘सगरमाथा २५ पटक चढ्छु’

"सक्न त अक्सिजनको सहायतामा म ६० वर्षसम्म पनि हिमाल चढ्न सक्छु। तर एउटा बिन्दुमा पुगेर रोकिनुपर्छ," उनको भनाइ छ।

"कम्तीमा २५ पटक चढेँ भने मैले रजत महोत्सव मनाउन सक्छु।"

एक्काइस पटक सगरमाथा चढिसकेका आप्पा शेर्पा र फुर्वातासी शेर्पाले आरोहणबाट सन्न्यास लिइसकेका छन् भने ३८ वर्षिय ङिमा नुरु शेर्पा अझै सक्रिय छन्।

ङिमा नुरु शेर्पा यस पटक तिब्बततर्फबाट सगरमाथा चढ्ने प्रयासमा छन्।

सबैभन्दा बढी सगरमाथा आरोहण

आरोहीआरोहण
कामिरिता शेर्पा२३
ङिमा नुरु शेर्पा२१
आप्पा शेर्पा२१
फुर्वातासी शेर्पा२१
आङ दोर्जी शेर्पा१९
छेवाङ निमा शेर्पा१९
मिङ्मा छिरी शेर्पा१९
लाक्पा रिता शेर्पा१७
कामिरिता शेर्पा१६
निमा गोम्बु शेर्पा१६
सबै आरोही नेपाली हुन्।
स्रोत: पर्यटन विभाग, नेपाल

सन् २०१४ मा खुम्बु आइसफलमा गएको हिमपहिरोमा १६ शेर्पाले ज्यान गुमाएपछि उनले आरोहण त्याग्ने मनसाय व्यक्त गरेका थिए।

तर हिमालसँगको पुरानो नाताले केही महिनामै उनको मन बदलियो।

'हिमाल चिन्नुपर्छ'

सगरमाथामा सफल हुनुको मन्त्र के हो? बीबीसीको प्रश्नमा कामिरिताले 'हिमाल चिन्नुपर्ने' र 'भाग्यले साथ दिनुपर्ने' बताएका थिए।

"कहिलेकाहीं सामान्य तयारी गर्ने पनि चुचुरोमा पुग्छ भने कहिलेकाहीं निकै तयारी गरेको र अनुभवी आरोही समेत माथि पुग्न सक्दैन।"

सगरमाथालाई चिन्ने उनको आफ्नै शैली छ।

उनी हिमाल चढ्नुभन्दा एक महिना अघिदेखि गुम्बाहरूमा पूजा गर्न सुरु गर्छन्।

"प्रत्येक हिमालमा देवीको बास हुन्छ। तपाईँको शरीरमा पाइला टेक्नुपर्‍यो भनेर माफी माग्दै पूजा गर्छु। चुचुरोमा पाइला टेक्नुअगावै तलबाटै तीन पटक ढोगेर माफी माग्छु।"

सम्बन्धित सामग्री