स्वीडन: जहाँ सांसद सल्लाहकार राख्दैनन्, सानो कोठामा बस्छन् र चियाको पैसा आफैँ तिर्छन्

  • 3 जुन 2019
पेर-अर्न हाकान्स्सन तस्वीर कपीराइट Jonas Esbjörnsson
Image caption संसदको खाजाघरमा पार्न यानहोक्यान्सन जस्ता सांसदहरू नियमित भेटिन्छन्

राजनीतिमा लाग्नु आर्थिक हिसाबले निक्कै फाइदाजनक हुनसक्छ।

तर स्वीडनमा त्यस्तो हुँदैन।

युरोपको यो देशमा जनप्रतिनिधिले आफ्नो काम गर्दा अपनाउने मितव्ययिता र सादा जीवन राजनीतिको एक परिचय हो।

उदार भत्ता र थुप्रै सुविधाहरूको स्थानमा स्वीडनका सांसदहरूले करदाताको पैसा खर्च गर्दा कसिलो सीमाहरूको पालना गर्ने गर्छन्।

"सामान्य नागरिक"

"हामी सामान्य नागरिक हौँ," सोसल-डेमोक्य्राटिक पार्टीका सांसद पार्न यानहोक्यान्सनले भने।

"हाम्रो काम भनेको नागरिकहरू र उनीहरूले जिउने जीवनलाई प्रतिनिधित्व गर्नु भएकोले सांसदहरूले विशेष सुविधा लिनु ठिक हुँदैन।"

"हाम्रो सुविधा भनेको आफ्नो काम गर्न पाउनु र देशलाई दिशानिर्देश गर्न पाउनु हो," यानहोक्यान्सनले भने।

तस्वीर कपीराइट Getty Images
Image caption प्रधानमन्त्री स्टेफान लोभेन गाडी भएका स्वीडन एकमात्र नेता हुन्

स्वीडनका सांसदहरूले सार्वजनिक यातायातमा नि:शुल्क यात्रा गर्न पाउँछन्।

तर उनीहरूलाई सरकारले कुनै गाडी वा चालक प्रदान गर्दैन।

स्वीडनको संसदसँग तीनवटा गाडी छन् जुन संसदका अध्यक्ष र तीन उपाध्यक्षले आधिकारिक कार्यक्रममा मात्रै उपभोग गर्न पाउँछन्।

तलब

"हामी यातायात सेवा दिन बसेको होइन," संसदका एक अधिकारीले बताइन्।

"यहाँ भएका गाडी मानिसहरूलाई घर लान वा कार्यालय पुर्याउन होइन।"

स्वीडनमा सरकारी गाडीको सुविधा पाउने एकमात्र नेता प्रधानमन्त्री हुन्।

तस्वीर कपीराइट Camilla Svensk/Sveriges Riksdag
Image caption स्वीडनका सांसदहरूको तलब अन्य देशको तुलनामा कम छ

स्वीडनका सांसदहरूले मासिक छ हजार नौ सय अमेरिकी डलर तलब बुझ्छन् जुन अमेरिकी सांसदले पाउने तलबभन्दा आधा हो।

स्वीडनका नागरिकहरूको औ‍सत मासिक तलब दुई हजार आठ सय डलर छ।

दैनिक भत्ता

राजधानी स्टकहोमभन्दा बाहिरबाट निर्वाचित सांसदहरूले संसद चलेको दिन दैनिक भत्ता पाउँछन्।

त्यो भत्ता दैनिक करिब १२ डलर हुन्छ जुन स्टकहोममा एक पटक खाना खान लगभग पुग्छ।

तस्वीर कपीराइट Ingemar Edfalk/Sveriges Riksdag

सन् १९५७ सम्म त त्यहाँका सांसदहरूले तलब पनि पाउँदैन थिए।

सांसदहरूलाई तलब दिने निर्णय कुनैपनि नागरिकले राजनीतिमा भाग लिनबाट वञ्चित हुन नपरोस् भनेर गरिएको थियो।

स्वीडनका सांसदहरूले सस्तोमा आवास सुविधा भने पाउँछन् तर त्यो पनि स्टकहोम बाहिरका सांसदहरूले मात्रै।

सानो वासस्थान

सांसदले पाउने आवास सुविधासम्पन्न छैन। पार्न यानहोक्यान्सन बस्ने ठाउँ ४६ स्क्वायर मिटरको मात्रै छ।

तस्वीर कपीराइट Claudia Wallin
Image caption सांसदहरू लागि प्रदान गरिने आवासमा पति वा पत्नी बस्दा पनि भाडा तिर्नुपर्छ

कुनै कुनै सरकारी क्वार्टर त १६ स्क्वायर मिटरको एउटा कोठा मात्रै भएका हुन्छन्।

ती सबै आवासमा लुगा धुने मेसिन वा भाँडा धुने मेसिन हुँदैनन् र एक जना सुत्ने खाटमात्रै हुन्छ।

करदाताहरूको पैसाले सांसदले मात्रै सुविधा पाउँछन्। उनीहरूको पति वा पत्नी वा छोराछोरीले त्यो स्थानमा एक रात मात्रै बस्न पनि पैसा तिर्नुपर्छ।

यदि कोही आफ्नो पति वा पत्नीसँग बस्न चाहेका आफूले पाउने स्थानको आधा भाडा सरकारलाई तिर्नुपर्छ।

तस्वीर कपीराइट Claudia Wallin
Image caption सांसदहरूले चियाको पैसा पनि आफैँ तिर्छन्

सांसदले सरकारी आवासको सुविधा नलिएर बाहिरै भाडामा बस्न सक्छन् र त्यसका लागि मासिक अधिकतम ८२० डलरसम्म पाउँछन्। त्यो पैसाले स्टकहोमको मुख्य स्थानहरूमा भाडामा आवास पाउन गार्‍है हुन्छ।

सन् १९९० सम्म त स्वीडनका सांसदहरू १५ स्क्वायर मिटरको कार्यालयमै सुत्नुपर्थ्यो।

स्वीडनका सांसदहरूले सहयोगी वा सल्लाहकारहरू राख्न पाउँदैनन्। संसदले दलहरूलाई दिने पैसाबाट दलहरूले नै आफ्ना सांसदहरूका लागि सहयोगीहरूको व्यवस्था गर्नुपर्छ।

सम्बन्धित सामग्री