ओमानको खाडीमा तेल ट्याङ्कर विस्फोट: चालकदलका सदस्यको उद्धार

  • 13 जुन 2019
विस्फोट तस्वीर कपीराइट ISNA via REUTERS

गल्फ अफ ओमान अर्थात् ओमानको खाडीमा भएको एउटा शङ्कास्पद आक्रमणमा दुईवटा ट्याङ्करमा क्षति पुगेको छ।

ती ट्याङ्करहरू विश्वकै व्यस्त तेल निर्यात मार्गमध्येको एउटा मार्गनजिकै थिए।

दुईमध्ये एक ट्याङ्करका सञ्चालकले त्यहाँ विस्फोटन भएको र आगलागी भएको बताएका छन्।

ती दुवै ट्याङ्करका टोलीलाई सुरक्षित स्थलमा सारिएको छ।

आशङ्का

गत मे महिनामा संयुक्त राज्य अमेरिकाका राष्ट्रपति डोनल्ड ट्रम्पले इरानमाथि अमेरिकी प्रतिबन्ध लगाएपछि उक्त क्षेत्रमा तनाव चुलिएको छ।

अमेरिकाले ती क्षेत्रमा इरानी आक्रमणको सम्भावना रहेको भन्दै आफ्नो सेनाको उपस्थिति बलियो बनाएको छ।

पछिल्लो शङ्कास्पद आक्रमणबारे वाशिङ्टनले प्रतिक्रिया जनाउन बाँकी छ। संवाददाताहरूका अनुसार अमेरिकाले सो घटनामा इरान संलग्न भएको शङ्का गरेको छ।

तेल ट्याङ्करहरूमा विस्फोटन भएपछि त्यसमा रहेका चालकदलका थुप्रै सदस्यको उद्धार गरिएको छ।

इरानले कोकुका करेजियसमा सवार २१ जना र फ्रन्ट एल्टेयरमा सवार २३ जनाको उद्धार गरेको जनाएको छ भने अमेरिकाले पनि आफ्ना नौसेनाले केहीको उद्धार गरेको बताएको छ।

झन्डै पाँच महिनासम्म ओरालो लागेको तेलको भाउ बिहीवारको घटनापछि ४.५ प्रतिशतसम्मले बढेको ब्लूमबर्गले लेखेको छ।

कारण

तेल ट्याङ्करमा के कारणले विस्फोट भएको थियो भन्ने चाहिँ स्पष्ट भएको छैन।

ती जहाजहरू अहिले संयुक्त अरब एमिरेट्सको फेजेराबाट ८० माइल र इरानबाट १६ माइल पर छन्।

संयुक्त अरब एमिरेट्स जाँदै गरेका चारवटा तेल ट्याङ्करमा हमला भएको एक महिनापछि यो घटना भएको हो।

संयुक्त अरब एमिरेट्स, साउदी अरब र नर्वेले गत साता संयुक्त राष्ट्रसङ्घको सुरक्षा परिषद्लाई संयुक्त प्रतिवेदन प्रस्तुत गर्दै ती ट्याङ्करमा विस्फोट गराउने उपकरणहरू गोताखोरले राखेको बताएका थिए।

तस्वीर कपीराइट Frederick A Terry/Artjom Lofitski

तर उनीहरूले त्यसको आरोप कुनै एउटा देशलाई भने लगाएका थिएनन्।

उक्त घटनामा क्षति भने कम भएको थियो। आगो लागेको थिएन र कसैलाई पनि सुरक्षित स्थानमा लैजानुपरेको थिएन।

तर बिहीवार दुईवटा तेल ट्याङ्करमाथि भएको घटना चाहिँ गम्भीर रहेको बताइएको छ।