सेल्फी खिच्दा नवविवाहित महिलासहित चार जनाको मृत्यु

  • 8 अक्टोबर 2019
बाँध तस्वीर कपीराइट Getty Images

दक्षिण भारतको तमिलनाडु राज्यमा एक नवविवाहित महिला र परिवारका तीन अन्य सदस्यले सेल्फी फोटो खिच्ने क्रममा एउटा सरोवरमा डुबेर ज्यान गुमाएको प्रहरीले बताएको छ।

६ जनाको समूहले एक आपसमा हात समातेर पाम्बार बाँधमा कम्मरसम्म पानी जम्मा भएको ठाउँमा उभिएर सेल्फी खिच्दै गर्दा एकजना अलि गहिरो स्थानमा पुगेका थिए।

ती व्यक्ति चिप्लिए र उनले अन्यलाई पनि ताने।

ती महिलाका पतिले आफ्नो बहिनीलाई बचाउन भ्याए तर बाँकी सबै डुबे।

घटना

द हिन्दू पत्रिकाका अनुसार आइतवार कृष्णागिरी को बार्गुरका नवविवाहित जोडी उथानगराइ भन्ने ठाउँमा रहेका आफन्त भेट्न गएका थिए। साथमा दुलहाका बहिनी पनि थिइन्।

तीनजना पानीभित्र पसेका थिए र साथमा तीन किशोरकिशोरी पनि थिए।

त्यतिनैखेर १४ वर्षीय किशोर चिप्लिए र सँगसँगै १८ र १९ वर्षका दिदीलाई आफूसँगै ताने। उनीहरूसँगै दुलही पनि डुबिन्।

भारतमा सेल्फी दुर्घटना धेरै

सेल्फीका कारण हुने दुर्घटना र मृत्युको लागि भारत कुख्यात छ।

सन् २०११ र सन् २०१७ को बीचमा विश्वभरि भएका सेल्फी मृत्युको सङ्ख्या २५९ थियो जसमध्ये आधा भारतमा भएको थियो।

भारतपछि धेरै सेल्फी दुर्घटना हुने देशहरूमा रुस, अमेरिका र पाकिस्तान पर्छन्।

भारतको हरियाणा राज्यमा मे महिनामा तीन किशोरहरूले रेलवे मार्गमा सेल्फी खिच्ने क्रममा अगाडिबाट आएको रेललाई छल्ने कोसिस गरेका थिए, तर विपरीत दिशाबाट आएको रेलको ठक्करबाट उनीहरूको ज्यान गयो।

सन् २०१७ मा कर्नाटक राज्यले चार विद्यार्थीको ज्यान गएपछि सेल्फी विरुद्ध सचेतना अभियान चलायो।

सोही वर्ष ओडिसा राज्यमा एकजना पुरुषले एक हात्तीसँगै उभिएर सेल्फी खिच्दै गर्दा उक्त हात्तीले सूँढले कसेर तिनको ज्यान गएको थियो।

सामाजिक सञ्जालमा अरूलाई प्रभावित गर्ने प्रयासमा मानिसहरूले जोखिमपूर्ण सेल्फी फोटो खिच्ने गरेको भन्दै त्यस्ता व्यवहारविरुद्ध जानकारहरूले चेतावनी दिएका छन्।

सम्बन्धित सामग्री