झोलामा महिलाको हात भेटिएपछि प्रख्यात रूसी प्राध्यापक गिरफ्तार

  • 10 नोभेम्बर 2019
सन् १८१२ को सैनिक पोशाकमा एक मेलामा भाग लिदैँ प्राध्यापक सोकोलभ तस्वीर कपीराइट EPA
Image caption सन् १८१२ को सैनिक पोशाकमा एक मेलामा भाग लिदैँ प्राध्यापक सोकोलभ

सेन्ट पिटर्सवर्गको प्रहरीले एकजना प्रख्यात रूसी इतिहासकारको झोलामा महिलाको हात भेटेपछि हत्याको शङ्कामा पक्राउ गरेको छ।

मदिराको नशामा रहेका ‌ओलेग सोकोलभ खोलामा मृत महिलाको शरीरका अङ्ग फ्याक्ने क्रममा खोलामा खसेको स्थानीय समाचार माध्यमहरूले लेखेका छन्।

प्रहरीले उनको घरमा छापा मारेर उनको एक २४ वर्षीय पूर्वविद्यार्थीको क्षतविक्षत शरीर भेटेको थियो।

प्राध्यापक सोकोलभ फ्रान्सेली शासक नेपोलियन बोनापार्टसम्बन्धी विज्ञ थिए। उनले फ्रान्सको सबैभन्दा सर्वोच्च पदक प्राप्त गरेका थिए।

हत्या गरिएकी महिला सोकोलभको एक प्रकाशनमा सहलेखक रहेकी अनास्तिसिया यस्चेन्कोको भएको बताइएको छ।

प्रहरी विज्ञप्तिमा मोइका नदीबाट एक ६३ वर्षीय पुरुषलाई उद्धार गरिएको र हत्याको आशङ्कामा पक्राउ गरिएको बताइएको थियो।

प्रहरी अधिकृतहरूले समाचार संस्था एएफपीलाई ती व्यक्ति प्राध्यापक सोकोलभ भएको पुष्टि गरेका छन्।

सोकोलभले नेपोलियनमाथि थुप्रै पुस्तकहरू लेख्नुका साथै केही फिल्महरूमा इतिहास सल्लाहकारका रूपमा काम गरेका छन्।

फ्रान्सको इन्स्टिच्युट अफ सोसल साइन्स, इकोनोमिक्स र पोलीटिक्सका सदस्य रहेका सोकोलभलाई शनिवार सो संस्थाबाट हटाइएको छ।

"हामीले आतङ्कित भावमा ओलेग सोकोलभ दोषी भएको अपराधको बारेमा थाहा पाएका छौँ," सो संस्थाले एक विज्ञप्तिमा भनेको छ।

सम्बन्धित सामग्री