चीनले अमेरिकालाई लगायो कोरोनाभाइरसबारे 'त्रास फैलाएको' आरोप

  • 3 फेब्रुअरी 2020
कोरोनाभाइरस

चिनियाँ सरकारले कोरोनाभाइरसको प्रकोपलाई लिएर "त्रास फैलाउने गरी" प्रतिक्रिया जनाएको अमेरिकामाथि आरोप लगाएको छ।

अमेरिकाले जनस्वास्थ्य सङ्कट घोषणा गरेकोमा र दुई सातायता चीन बसेका विदेशी नागरिकको आवागमनमा रोक लगाउने निर्णय गरेपछि चीनको यस्तो प्रतिक्रिया आएको हो।

चीनमा १७ हजारभन्दा बढी मानिसमा कोरोनाभाइरस देखा परेको पुष्टि भइसकेको छ। चीनमा मात्रै करिब ३६१ जनाको ज्यान गइसकेको छ।

चीन बाहिर १५० जनाभन्दा बढीमा भाइरस पाइएको पुष्टि भइसकेको छ भने फिलिपिन्समा एक जनाको मृत्यु भएको छ।

चीनले अरू के भन्यो?

सोमवारको समाचार विवरणमा चिनियाँ विदेश मन्त्रालयका प्रवक्ताले अमेरिकी कदमले 'केवल त्रास निम्त्याएको र फैलाएको' भनेकी छन्।

सहायता गर्नुको सट्टा चिनियाँ नागरिकमाथि प्रतिबन्ध लगाउने पहिलो देश अमेरिका भएको र उसैले आफ्ना दूतावासबाट आंशिक रूपमा मानिस फिर्ता लगेको पनि उनले बताएकी छन्।

"महामारीबाट जोगिने बलियो क्षमता भएका अमेरिकाजस्ता विकसित देशले नै खासगरी... विश्व स्वास्थ्य सङ्गठनको सिफारिसभन्दा विपरीत प्रतिबन्धहरू लगाउने अग्रणी भएका छन्," रोयटर्सलाई उनले भनेकी छन्।

तस्वीर कपीराइट Reuters

अमेरिकाले प्रतिबन्ध लगाएलगत्तै अस्ट्रेलियाले पनि आफ्नो देशमा चिनियाँ नागरिकको आवागमनमा प्रतिबन्ध लगाएको छ।

सोमवार नै हङ्‌कङले पनि चीनसँग जोडिएका १३ मध्ये १० वटा सीमाबाट मध्यरातदेखि मानिसको आवागमन रोक्ने जनाएको छ।

विश्व स्वास्थ्य सङ्गठनले खासमा यात्रुहरू अनौपचारिक रूपमा देश प्रवेश गरे त्यसले झन् भाइरसको सङ्क्रमण बढाउन सक्ने भन्दै सीमा बन्द गर्ने निर्णयप्रति सतर्क गराएको छ।

अमेरिकाले त्यस्तो के उपाय अपनायो?

ज्यानुअरी २३ तारिखमा अमेरिकाले आफ्ना अत्यावश्यक बाहेकका सबै नागरिक र उनीहरूका परिवारका सदस्यलाई भाइरस देखापरेको वुहान शहरबाट फर्किन निर्देशन दिएको थियो।

त्यसको एक साताभन्दा कम समयमै अत्यावश्यक बाहेकका अमेरिकी सरकारका कर्मचारी र उनीहरूका आफन्तलाई स्वेच्छिक रूपमा बाहिरिन अनुमति दिएको थियो।

ज्यानुअरी ३० तारिखमा विश्व स्वास्थ्य सङ्गठनले यो नयाँ भाइरसबारे विश्वव्यापी रूपमा स्वास्थ्य सङ्कटकाल घोषणा गरेको थियो।

उक्त निर्णयपछि अमेरिकाले आफ्ना सबै कर्मचारीका परिवारका २१ वर्षमुनिका सदस्यलाई अमेरिका फर्किन निर्देशन दिएको थियो।

हुबे प्रान्तमा रहेका कुनै पनि अमेरिकी नागरिक स्वदेश फर्किएपछि उनीहरू दुई सातासम्म निगरानीमा बस्नुपर्छ।