पशुपतिनाथ मन्दिरभित्र १४२ किलो सुनको जलहरी निर्माण हुने

  • 19 फेब्रुअरी 2020
पशुपतिनाथ मन्दिर परिसरमा रहेको शिवलिङ्गसहितको जलहरी तस्वीर कपीराइट PADT
Image caption पशुपतिनाथ मन्दिर परिसरमा रहेको एउटा जलहरी

पशुपतिनाथ मन्दिरको मुख्य शिवलिङ्ग अवस्थित पीठिकामा रहेको जलहरी निर्माण गर्नका लागि अनुमानित १४२ किलो सुन चाहिने पशुपति क्षेत्र विकास कोषले जनाएको छ।

नेपाली बृहत् शब्दकोशका अनुसार जलहरी भनेको शिवलिङ्ग अडिने आधार हो जसबाट दूध, मह तथा पानी लगायतका चढाइएका वस्तुहरू बगेर जान्छन्।

हाल चाँदीबाट बनेको उक्त जलहरी जीर्ण बन्दै गएकोले झन्डै दुई वर्षको छलफल तथा परामर्शपश्चात् सुनको जलहरी निर्माण गर्ने निर्णयमा कोष पुगेको बताइएको छ।

कोषका सदस्यसचिव डा. प्रदीप ढकालका अनुसार सुन पवित्र तथा सर्वोत्कृष्ट धातु मानिने भएकोले सुनकै जलहरी बनाउने निर्णय भएको हो।

सहयोगको आह्वान

कोषले मङ्गलवार सार्वजनिक आह्नान गर्दै न्यूनतम एक तोलादेखि अधिकतम एक किलोसम्म सुन वा सो बराबरको रकम दान गर्न सकिने बताएको छ।

ढकालले भने, "कैयन् दाताले एक्लैले दान गर्न इच्छा व्यक्त गरेपनि आम भक्तजनको अपनत्व बढाउन सुनदानको परिधि तोक्दै सार्वजनिक आह्वान गरेका हौँ।"

विज्ञको परामर्शमा पशुपतिका भट्ट तथा पुजारीको सहयोगमा जलहरीको नापजाँच गर्ने काम सकिएको र हाल नापनक्सा बनाउने काम भइरहेको उनले बताए।

विसं २०७७ को शिवरात्रीसम्म सुनको जलहरी निर्माण सम्पन्न गरिसक्ने कोषको लक्ष्य छ।

तस्वीर कपीराइट PADT

सुनको खपत

कोष परिसरभित्रै कडा सुरक्षाबीच कालिगढले निर्माण गर्ने जलहरीलाई शिवलिङ्गको पीठिकामा भने भट्टहरूले नै जडान गर्ने बताइएको छ।

सो कार्य गर्न भट्टहरूलाई आवश्यक तालिमको व्यवस्था मिलाइएको कोषले जनाएको छ।

सदस्यसचिव ढकालले भने, "अनुमानित १४२ केजी सुन खपत हुने र ज्यालासहित करिब ९२ करोड खर्च हुनेछ।"

कोषको अनुमानमा जलहरी उठेको भागमा १४ गेज मोटाइ भएको सुनको पाता प्रयोग गर्दा २९.१ किलो, बाहिर उठेको भागमा १६ गेज मोटाइ भएको सुनको पाता प्रयोग गर्दा १८.१ किलो, भित्र उठेको भागमा १६ गेज मोटाइ भएको सुनको पाता प्रयोग गर्दा १०.८ किलो खपत हुनेछ।

तस्वीर कपीराइट Reuters

त्यसैगरि १४ गेज मोटाइ भएको जलहरी बनाउन ३४.६५ किलो, १६ गेजको नाग बनाउन २८.६१ किलो र छ गेजको नागकन्याको आकृति बनाउन ७.९ किलो सुन लाग्ने अनुमान गरिएको छ।

त्यसका अतिरिक्त कूल खपत हुने सुनको १० प्रतिशत अर्थात् झन्डै १२.९२ किलो सुन जगेडा स्वरूप रहने छ।

आवश्यकताभन्दा बढी सुन प्राप्त भएमा पशुपतिनाथ मन्दिरको गजुर तथा बसाहा लगायतका मूर्तिमा रासायनिक प्रक्रियाले सुनको जलप लगाइने योजना छ।

झन्डै दुई वर्षदेखि जलहरी निर्माणबारे चर्चा हुँदै आएपनि केहीको फरक मत रहँदै आएकोले ढिलाइ भएको कोषको भनाइ छ।

दाताले विभिन्न पाँच ब्याङ्कको माध्यमबाट तथा बेनामे तरिकाले दान गर्ने व्यवस्था मिलाइएको कोषले जनाएको छ।

सम्बन्धित सामग्री