भारतीय विदेशमन्त्री एस जयशङ्करको टिप्पणी विवादमा परेपछि भारतले भन्यो- 'बुद्ध नेपालमै जन्मिएको विषयमा कुनै शङ्का छैन'

लुम्बिनी

परराष्ट्र मन्त्रालयले गौतम बुद्धको जन्मस्थल नेपालमै रहेको भन्ने तथ्य निर्विवाद रहेको बताएको छ।

भारतीय विदेशमन्त्री एस जयशङ्करले गौतम बुद्धबारे गरेको टिप्पणीलाई लिएर पत्रकारहरूले राखेको जिज्ञासाको जबाफमा नेपालको परराष्ट्र मन्त्रालयले यस्तो बताएको हो।

शनिवार एउटा भर्चुअल सम्मेलनमा भारतीय विदेशमन्त्री जयशङ्करले "दुई महान् भारतीय" भन्दै गौतम बुद्ध र गान्धीको नाम लिएका थिए र उनीहरूलाई विश्वले सम्झने बताएका थिए।

उनको यो अभिव्यक्तिलाई लिएर नेपालमा राजनीतिक नेतृत्वदेखि सामाजिक सञ्जालहरूमा तीव्र आलोचना भएको छ।

यसैबीच आइतवार भारतको विदेश मन्त्रालयले यसबारे प्रतिक्रिया जनाएको छ।

सञ्चारकर्मीको जिज्ञासाको जबाफमा उसले विदेशमन्त्रीको टिप्पणी बौद्ध सम्पदासँग जोडेर गरिएको जनाएको हो।

बुद्धको जन्मस्थल नेपालमा रहेको लुम्बिनीमै भएको कुरामा विवाद नरहेको पनि उक्त प्रतिक्रियामा उल्लेख छ।

भारतीय विदेशमन्त्री जयशङ्करको टिप्पणीलाई लिएर नेपालस्थित परराष्ट्र मन्त्रालयमा पनि प्रश्नहरू सोधिएको थियो।

त्यसको जबाफमा नेपालको परराष्ट्र मन्त्रालयका प्रवक्ताले भनेको छ, "ऐतिहासिक र पुरातात्त्विक प्रमाणहरूले गौतम बुद्धको जन्म नेपालको लुम्बिनीमा भएको तथ्य स्थापित र निर्विवाद छ।"

उक्त नोटमा भारतीय प्रधानमन्त्री नरेन्द्र मोदीले पनि सन् २०१४ मा गरेको नेपाल भ्रमणका क्रममा बुद्ध नेपालमै जन्मिएको कुरा संसद्‌मै बताएको उल्लेख छ।

बौद्ध धर्म नेपालबाट विश्वका अन्य भागमा फैलिएको एवम् यो विषय दुविधा र विवादभन्दा पर रहेको मन्त्रालयले जनाएको छ।

यो विषयमा समग्र अन्तर्राष्ट्रिय समुदाय जानकार रहेको भन्दै यो बहसको विषय बन्न नसक्ने मन्त्रालयले दिएको जवाफमा उल्लेख छ।