अफगानिस्तान: तालिबानमाथि गर्भवती प्रहरीको हत्या गरेको आरोप

बानू नेगर

तस्बिर स्रोत, NEGAR FAMILY

तस्बिरको क्याप्शन,

बानू नेगर

तालिबान समूहले अफगानिस्तानको एउटा सहरमा एक जना महिला प्रहरीको गोली हानेर हत्या गरेको प्रत्यक्षदर्शी बीबीसीलाई बताएका छन्।

स्थानीय सञ्चारमाध्यमहरूका अनुसार बानू नेगर नाम गरेकी ती महिला प्रहरीलाई घोर जिल्लाको फिरोजकोह सहरमा आफ्नै घरमा परिवार कै अघि मारिएको थियो।

अफगानिस्तानमा महिलाहरू विरुद्ध बढ्दो हिंसाका घटनाका खबरबीच पछिल्लो हत्या सार्वजनिक भएको छ।

तालिबानले भने उक्त घटनामा आफूहरूको संलग्नता नरहेको बीबीसीलाई बताउँदै आफूहरूले घटनाको छानबिन गरिरहेको जनाएको छ।

प्रवक्ता जबिहुल्लाह मुजाहिदले भने: ''यो घटना हामीले थाहा पाएका छौँ र म यो पुष्टि गर्छु कि तालिबानले उनलाई मारेको होइन, हाम्रो छानबिन जारी छ।''

तालिबानले यस अघि नै पूर्ववत् सरकारसँग काम गरेका मानिसहरूलाई आम माफी दिइसकेको उनले थपे र नेगरको मृत्युको कारण ''व्यक्तिगत दुस्मनी वा अन्य केही हुनसक्ने'' बताए।

घटनाबारे बोले बदला लिन सक्ने डरका कारण स्थानीय बासिन्दाहरू मौन छन्। त्यसले गर्दा घटनाको विस्तृत विवरण अझै अस्पष्ट छ।

तस्बिर स्रोत, Reuters

तस्बिरको क्याप्शन,

तालिबान प्रवक्ता जबिहुल्लाह मुजाहिद

परिवार सदस्यहरूका अनुसार स्थानीय बन्दीगृहमा कार्यरत नेगर गर्भवती थिइन्। उनको कोखमा आठ महिनाको बच्चा थियो।

शनिवार उनको घरमा तीन जना बन्दुकधारी आएको र परिवारका सदस्यहरूलाई बाँधेर राख्नु अघि घरमा खानतलासी गरेको आफन्तहरू बताउँछन्।

ती बन्दुकधारीहरूले अरबी भाषामा बोलेको सुनिएको एक जना प्रत्यक्षदर्शी बताए।

गत अगस्ट १५ तारिखमा काबुल सहित अफगानिस्तानको अधिकांश भाग आफ्नो नियन्त्रणमा लिएसँगै तालिबानले आफूलाई विगत भन्दा बढी सहिष्णु समूहका रूपमा चित्रण गर्न खोजेको छ।

त्यो उसका विश्वव्यापी परिचय भन्दा फरक हो।

तर अफगानिस्तानका विभिन्न स्थानहरूमा अझै क्रूरता र दमनका घटनाहरू भएको सार्वजनिक भइरहेका छन्।