प्रचण्डको प्रस्तावप्रति अन्य दल आशावादी

  • 26 एप्रिल 2011
एकीकृत नेकपा माओवादी
Image caption प्रचण्डको प्रस्ताव पार्टिले अंगाले राजनीतिक जटिलता खुकुलो हुने अरु दलले ठानेका छन्

संविधान लेखन र सेना समायोजन टुंग्याउन केन्द्रित रहेको एकीकृत नेकपा माओवादीका अध्यक्ष पुष्पकमल दाहाल प्रचण्डको प्रस्तावप्रति माओवादीको केन्द्रिय समितिको बैठकमा धेरैले समर्थन जनाएपछि अन्य दलका नेताहरु केही उत्साहित बनेका छन्।

शुक्रबारदेखि जारी उक्त बैठकमा प्रचण्डको प्रस्ताव र त्यसको विरुद्ध ल्याइएको उपाध्यक्ष किरणको फरक प्रस्तावमाथि पक्ष र विपक्षमा उत्रिएर बहस भएको थियो।

समाधानमुखी

प्रचण्डको प्रस्तावले सेना समायोजनमा लचिलो हुन, शुरुमै समायोजन हुन चाहने र नचाहने लडाकूहरुलाई छुट्ट्याउने वा रिग्रुपिङमा लान मिल्ने कुरा राखेको भन्दै उपाध्यक्ष मोहन वैद्य किरण पक्षधरले त्यसको सशक्त विरोध गरेको थियो।

तर अन्य राजनीतिक दलहरुले भने प्रचण्डको प्रस्ताव समाधानमुखी भएको बताएका छन्।

“लडाकू समायोजन तथा पुनर्स्थापनाका पुराना सम्झौताहरुको सही व्याख्यासंग नजिक आउन खोजेको लक्षण देखिएको छ। समायोजन हुने लडाकूहरुको संख्या निर्धारण गर्ने, समायोजन हुन चाहनेहरुलाई छुट्टै शिविरमा राख्ने, अनि पुनर्स्थापनमा जान चाहनेहरुलाई छुट्ट्याएर राख्ने भन्ने सम्मको लाईनबाट प्रस्ताव आउन खोजेको छ,” नेपाली कांग्रेसका महामन्त्री कृष्ण सिटौलाले भने।

तर विगतमा आफ्नो नीतिमा अडिग रहन नसकेका अनुभवका कारण प्रचण्डको प्रस्तावप्रति तुरुन्तै समर्थन जनाइहाल्न नसकिने सिटौलाको भनाई थियो।

“अब त्यो कसरी पारित हुन्छ भन्ने हेर्न बाँकि छ। त्यहाँ उठेका विभिन्न तर्कहरुलाई मिसमास पारेर प्रस्ताव पारित हुँदा वहाँले ल्याएको प्रस्तावको कार्यदिशानै अर्कै हुने सम्भावनापनि छ। पारित भइसकेपछि भने हामी त्यसलाई गम्भीरतापूर्वक अध्ययन गर्नेछौं,” सिटौलाले बताए।

आशा

जेठ १४ भित्र नयाँ संविधान पूरापूर लेखिसक्ने सम्भावना लगभग समाप्त भएका संकेतहरु मिलेको बेला प्रचण्डको प्रस्तावले त्यतिञ्जेल मतभेदसहितको संविधानको मस्यौदा तयार पार्ने कुरा गरेको छ।

त्यसले मतभेद समाधान गरेर नयाँ संविधान लेखिने सम्भावना कमजोर बनाएपनि शान्तिप्रति जनतामा आशा जगाउन सक्ने अन्य दलहरुको भनाई छ।

“प्रचण्डले माओवादीलाई दुर्घटनामा जानबाट रोक्ने पहल लिनुभएको छ भने विद्रोहको कुरा थाँती राख्नाले त्यसबाट पर्नसक्ने जोखिमबाट मुलुक तत्कालका लागि जोगिएको छ। जनतामा आशा जागेको छ तर वहाँले समाधान दिन अझै सक्नु भएको छैन,” नेकपा एमालेका सचिव शंकर पोखरेलले बताए।

प्रचण्डको लाईन हावी देखिएको बेला त्यसले जनविद्रोहको वकालत गर्नेहरु माओवादीभित्रै कमजोर हुने ठानिएको छ।

पाँच महिना अगाडि उपाध्यक्ष किरणको जनविद्रोहको लाईनसंग निकट रहँदा पार्टिमा हावी हुन सफल प्रचण्ड अहिले त्यसलाई थाँती राखेर शान्ति र संविधानको लाईनलाई अंगाल्दा पनि उत्तिकै हावी हुने देखिएको छ।