माओवादीमा कन्टेनरको साँचो विवाद लम्बियो

  • 3 सेप्टेम्बर 2011
maoists office kathmandu
Image caption साँचो विवादको पक्ष र विपक्षमा चर्काचर्की भएको छ

हतियार राखिएको कन्टेनरको साँचो विशेष समितिलाई बुझाउनेबारे एकीकृत माओवादी भित्र चर्केको झगडा लम्बिएको छ।

शनिबार चार घन्टा भन्दा बढि लम्बिएको माओवादी स्थायी समिति बैठकमा दुवै पक्षले आ आफ्ना अडानमा चर्काचर्की गरेका थिए।

शिविरमा रहेका लडाकुका हतियार रहेको कन्टेनरको साँचो विशेष समितिलाई बुझाउने निर्णयको विरोधमा शुक्रबार स्थायी समिति बैठक नै बहिस्कार गरेको बैद्य समुहले शनिबार भने बैठकमा भाग लिएको थियो।

अडान

बैठकमा माओवादी अध्यक्ष पुष्पकमल दाहाल प्रचण्डले सरकार बनाउनुभन्दा अगाडि आफुहरुले सार्वजनिक गरेको निर्णय बमोजिम नै साँचो बुझाइएको दोहोर्‍याएका थिए।

प्रचण्डको भनाइ उदृत् गर्दै स्थायी समिति सदस्य वर्षमान पुन भन्छन्, "स्थायी समितिले गरेको निर्णय नै कार्यान्वयन गरेको हो, प्रधानमन्त्री निर्वाचन अघि सरकार बन्ने वित्तिकै अविलम्ब गर्ने भनिएका काम नै गरिएको हो।"

पुनका अनुसार बरु पार्टी निर्णय विपरित गएर सडकमा चक्का जाम गर्ने, मशाल जुलुश निकाल्ने, विज्ञप्ती जारी गर्ने काम गरेकोमा बैद्य पक्षले आत्मालोचना गर्नुपर्ने पार्टी संस्थापनको दवाव थियो।

आशा

आइतबार हुने बैठकमा कुरा मिल्ने र सरकारमा जाने व्यक्तिहरुको टुंगो पनि लगाइने पुनको आशा छ।

विशेष समितिलाई साँचो बुझाउने निर्णय खारेज हुनुपर्ने माग राख्दै सडकमा उत्रिएको मोहन बैद्य पक्ष पनि आइतबारको बैठकको प्रतिक्षामा छ।

निष्कर्ष

बैद्य पक्षधर मानिने स्थायी समिति सदस्य नेत्रविक्रम चन्द भन्छन्, "आज कहाँ त्रुटी भएको छ कहाँ प्रक्रिया मिलेको छैन भन्ने समष्टीगत रुपमा कुरा राख्यौं भोली निष्कर्ष निस्केला।"

तराइकेन्द्रित दलहरुको मोर्चासँग चारबुँदे सहमति गरेर सरकार बनाएको एक हप्ता पुग्दा पनि माओवादी आन्तरिक किचलोका कारण मन्त्रीपरिषदमा आफ्ना सदस्यहरु पठाउन सकिरहेको छैन।

काठमाडौंस्थित बीबीसीकी एकजना संवाददाता भन्छिन्, किचलो लम्बिएमा सरकारको भविष्यमै समे ठूलो प्रश्न उठ्न सक्ने धेरैको भनाइ छ।