‘जति पिए पनि रक्सीले हानी नै गर्छ’

  • 8 जनवरी 2016
तस्वीर कपीराइट sekt.kiev.ua

हानी नगर्ने स्तरमा रक्सी सेवनको कुनै परिमाण नरहेको ब्रिटेनका स्वास्थ्य अधिकारीहरुले बताएका छन्।

२० वर्षमा पहिलो पटक पुनरावलोकन गरिएको सुझावमा, उनीहरुले एकदमै न्यून मात्रामा रक्सी सेवन गर्दा समेत क्यान्सरको जोखिम हुन सक्ने निष्कर्ष निकालेका हुन्।

ती अधिकारीहरुले महिला तथा पुरुषलाई एक साताभित्र कम्तीमा ३ दिन लगाएर सात गिलास वाईन, वा तीन लिटर बियरभन्दा बढी नपिउन सुझाव दिएका छन्।

पछिल्लो मापदण्डसँगै ब्रिटेन पनि क्यान्सर र रक्सी सेवनबीचको सम्बन्धसँग जुध्न सावधानी अपनाउने प्रयास गरिरहेका अष्ट्रेलिया र क्यानेडा जस्तै राष्ट्रहरुको समूहमा ‌समावेश भएको छ।

मापदण्ड

ब्रिटेनका प्रमुख स्वास्थ्य अधिकारीहरुले तयार पारेको मापदण्डमा रक्सी सेवनको कुनै सुरक्षित मात्रा नरहेको प्रष्ट पार्दै एक हप्तामा १४ युनिट अर्थात ६ पिन्ट बियर वा ७ गिलास वाईनभन्दा बढी पिउन नहुने उल्लेख गरिएको छ।

यदि मानिसहरुले पिउने हो भने त्यो तीनभन्दा बढी दिन लगाएर हुनुपर्ने र केही दिन रक्सी सेवन नगरी बस्नुपर्ने सुझावमा उल्लेख छ।

तस्वीर कपीराइट Getty

गर्भवती महिलालाई एक थोपा पनि रक्सी नपिउन भनिएको छ।

अघिल्लो मापदण्डले पनि गर्भवती महिलाले रक्सी सेवन गर्नु नहुने उल्लेख गरेको थियो तर त्यसमा ब्रिटेन, वेल्स र नर्दन आयरलण्डमा पिउनै परे एकचोटी वा दुईचोटी गरि हप्तामा एक वा दुई युनिट मात्र सेवन गर्न छुट दिइएको थियो।

त्यस्तो अवस्थामा मात्तिने गरी नखान महिलाहरुलाई भनिएको थियो।

पछिल्लो निर्देशिकाले दुर्घटना वा चोटपटकको जोखिम बढ्ने भन्दै एक वा दुई पटकमै रक्सी भरिएका गिलास नरित्याउन ध्यानाकर्षण गराएको छ।

महिला

सन् १९९५ यता रक्सीसम्बन्धी मापदण्डलाई पूर्ण रुपमा पहिलो पटक पुनरावलोकन गरिएको हो।

विगतमा सन् २००७ र २००९ मा क्रमश गर्भवती महिला र किशोर किशोरीका बारेमा सुझाव थपिएको थियो।

पुरानो मापदण्डमा पुरुषले दिनमा बढीमा तीन देखी चार युनिट ( ७५ देखि १०० मिलिलिटर स्पिरिट) अनि महिलाले दुईदेखि तीन युनिट (५० देखी ७५ मिलिलिटर स्पिरिट) ४८ घण्टाको अन्तर पारेर सेवन गर्न सक्ने उल्लेख गरेको थियो।

तस्वीर कपीराइट Getty

तर नयाँ मापदण्डले महिला र पुरुषमा कुनै फरक गरेको छैन र हप्ताभरमा १४ युनिटभन्दा बढी रक्सी नपिउन भनेको छ।

उक्त अध्ययनले ५५ वर्ष नाघेका महिलाहरुले भने एक हप्तामा ५ युनिट हुने गरै थौरै मात्रामा रक्सी सेवन गरे उनीहरुको मुटुमा केही फाइदा पुग्न सक्ने भने उल्लेख गरेको छ।

विगतमा केही अध्ययनले थौरै परिमाणमा रक्सी पिउँदा त्यसले पुरुषहरुलाई मुटुसम्बन्धी रोगबाट जोगाउने उल्लेख गरेको थियो तर पछिल्लो मापदण्डले त्यस्तो अवस्था नरहेको प्रष्ट पारेको छ।

क्यान्सर

नयाँ मापदण्डको अर्को प्रमुख विशेषता चाहीँ त्यसले रक्सी सेवनले क्यान्सरको जोखिम बढाउने कुराको प्रमाण भेटिएको जनाएको छ।

नियमित रुपमा जुनसुकै परिमाणमा रक्सी सेवन गरियो भने पनि त्यसले मुख, घाँटी र स्तन जस्ता विभिन्न प्रकारका क्यान्सरको जोखिम बढाउने मापदण्डमा जनाइएको छ।

सन् १९९५ मा क्यान्सरलाई राम्ररी नबुझिएको भन्दै अध्ययनमा १४ युनिटको सीमा निर्धारण गरेर रक्सी सेवनका कारणले हुने मृत्युको जोखिमलाई एक प्रतिशतमा राखिएको जनाइएको छ।

ब्रिटेनका प्रमुख स्वास्थ्य अधिकारी डेम स्याली डेभिसले भनिन्, “दैनिक रुपमा कुनै पनि परिमाणमा रक्सी सेवन गर्दा त्यसले जो कोहीमाथि पनि स्वास्थ्य जोखिम निम्त्याउँछ, तर यदि पुरुष तथा महिलाले रक्सी सेवनको मात्रा हप्तामा १४ युनिटभन्दा बढाएनन् भने त्यसले क्यान्सर र कलेजोको रोगसम्बन्धी जोखिम कम गर्छ।”

पछिल्लो मापदण्डलाई हालसम्मकै सबैभन्दा वैज्ञानिक जानकारी भन्दै उनले अहिले पनि रक्सी सेवन गर्ने चार जनामध्ये एकले हाल सिफारिस गरिएको भन्दा बढी परिमाणमा पिउने गरेको उल्लेख गरिन्।

अल्कोहल हेल्थ एलायन्सका अध्यक्ष प्राध्यापक इयान गिलमोरले पछिल्लो सुझाव अत्यावश्यक रहेको बताएका छन्।

उनले भने “ मानिसहरुले रक्सी सेवनको जोखिमबारे जानकारी पाउनुपर्छ, वास्तविक र पारदर्शी सूचनाकै कारण उनीहरुले आफूले कति पिउने भनेर सही निर्णय लिनसक्छन्।”