मान्यता पाउन दुई क्रिकेट संघको दौडधुप

  • 10 जनवरी 2016
तस्वीर कपीराइट AP
Image caption राजनीतिक किचलोका कारण नेपालको क्रिकेट पछाडि पर्न सक्ने चिन्ता व्यक्त हुन थालेको छ।

खेलकुदमा नेपाललाई अन्तर्राष्ट्रियस्तरमा चिनाएको क्रिकेटसँग सम्बन्धित दुईवटा समिति गठन भएपछि दुवैले अन्तर्राष्ट्रिय क्रिकेट परिषद् (आइसीसी) को मान्यता पाउन पहल शुरु गरेका छन्।

अर्को हप्ता दुबईमा हुने आइसीसीको बोर्ड बैठकमा नेपालको विवादबारे छलफल हुने भएपछि दुवै संघले आफ्ना प्रतिनिधि त्यसतर्फ पठाउने तयारी गरेका हुन्।

अहिले राष्ट्रिय खेलकुद परिषद्को मातहतमा रहेर काम गरिरहेकी नेपाल क्रिकेट संघकी प्रमुख कार्यकारी अधिकृत भावना घिमिरे मंगलबार दुबई जाँदैछिन्।

उनले त्यहाँ हुने प्रमुख कार्यकारी अधिकृतको बैठकमा भाग लिने र अर्को हप्ता हुने आइसीसी बैठकमा नेपाली क्रिकेट संघको निर्वाचनबारे जानकारी गराउने बताइएको छ।

आधिकारिकता

लगातारको विवादमा फस्दै आएको नेपालको क्रिकेट संघप्रति असन्तुष्ट देखिएको आइसीसीले जनवरी १४ को बैठकबाट संघको आधिकारिकताबारे निर्णय गर्ने ठानिएको छ।

प्रमुख कार्यकारी अधिकृत घिमिरे भन्छिन्, “मेरो काम भनेको अहिले नेपाली क्रिकेटमा के भइरहेको छ त्यो भन्ने हो, के मा समस्या आइरहेको छ वर्तमान अवस्था के हो? मेरो विचार मैले दिने हो।”

गत मंसिर २८ गते खेलकुद परिषद्को निर्देशन बेवास्ता गर्दै चतुरबहादुर चन्दको अध्यक्षतामा गठित संघले निर्वाचनको जानकारी आइसीसीलाई गराएको छ।

तर परिषद्ले अर्को क्रिकेट संघ गठन गरिपछि आफ्नो समितिलाई आधिकारिकता दिलाउन उक्त संघका महासचिव अशोकनाथ प्याकुरेल पनि आइसीसी बैठकमा जाने तयारीमा छन्।

तर एसोसियट राष्ट्रको बैठक नभएकोले आइसीसीको निम्तो पर्खेको उनी बताउँछन्।

एकतर्फी

उनले भने, “हामीले विभिन्न च्यानलबाट त्यहाँ कुरा पुर्याएका छौँ, केही कुरा बुझ्नु छ तिमीहरु आउ भन्छौ भने एकतर्फी कुरा नसुन, हाम्रो कुरा सुन्नुछ भने हामी जुनसुकै बेला पनि त्यहाँ आउन तयार छौँ भनेर हामीले भनेका छौँ।”

विवादका कारण अन्तर्राष्ट्रिय मैदानमा अघि बढेको राष्ट्रिय टोलीको प्रदर्शनमा असर पर्नुका साथै अन्तर्राष्ट्रिय निकायबाट पाइने ठूलो बजेट समेत रोकिएपछि क्रिकेट संघमा सरकारी हस्तक्षेप शुरु भएको थियो।

तस्वीर कपीराइट CAN

युवा तथा खेलकुद मन्त्रालयले पनि तदर्थ समिति बनाएपनि त्यसविरुद्ध क्रिकेट संघले दायर गरेको मुद्दामा सर्वोच्च अदालतले अन्तरिम आदेश जारी गरेपछि मन्त्रालयको कमिटी छाँयामा परेको थियो।

पछिल्लो पटक नयाँ समिति बनाएका परिषद्का सदस्य सचिव केशवकुमार विष्ट यसपटक आइसीसीकै सहमतीमा नयाँ कमिटी बनाएको दाबी गर्छन्।

उनी भन्छन्, “तदर्थ समिति बनाउनु अगाडिनै हामीले यसबारे आइसीसीलाई जानकारी गराएका छौँ र आइसीसीले हामीलाई अगाडि बढ्न सकारात्मक संकेत दिएको छ।”

क्रिकेट संघको लामो विवाद आइसीसीको निर्णयपछि किनारा लाग्ने ठानिएको छ।