बन्दुकसम्बन्धी टिप्पणीले ट्रम्प विवादमा

  • 10 अगस्ट 2016
तस्वीर कपीराइट AP

रिपब्लिकन पार्टीबाट अमेरिकी राष्ट्रपतिका उम्मेदवार रहेका डोनल्ड ट्रम्पले बन्दुकको स्वामित्व चाहने आफ्ना समर्थकहरुलाई उनीहरुको संवैधानिक अधिकार खारेज गर्नबाट डेमोक्र्याटिक प्रतिस्पर्धी हिलरी क्लिन्टनलाई रोक्न आह्वान गरेपछि त्यसले नयाँ विवाद जन्माएको छ।

नर्थ क्यारोलाइनामा भएको र्यालीमा ट्रम्पले यदी क्लिन्टनले जिते उनले सर्वोच्च अदालतमा नयाँ न्यायाधीश नियुक्त गरेर संवैधानिक परिवर्तन गर्न बाध्य पार्ने बताए।

समर्थकहरुलाई क्लिन्टनविरुद्ध कदम चाल्न आह्वान गर्दा ट्रम्पले आफ्नी प्रतिद्वन्द्वीविरुद्ध कुनै हिंसा गर्न खोजेको रुपमा कतिपयले हेरेका छन्।

क्लिन्टनले चुनावी प्रचारप्रसारको अभियानमा ट्रम्पको उक्त टिप्पणीलाई खतरनाक भन्दै निन्दा गरेकी छन्।

आरोप

ट्रम्पले आफ्नो चुनावी प्रचारप्रसारका क्रममा श्रृंखलाबद्ध रुपमा केही गलत कदम चालेपछि त्यसलाई पुन: मिलाउने प्रयास गरिरहेको जस्तो देखिंदा, उनको यो पछिल्लो टिप्पणी आएको हो।

नर्थ क्यारोलिनामा भएको र्यालीमा बोल्दै उनले यदि हिलरी क्लिन्टन राष्ट्रपतिमा निर्वाचित भए उनले संघीय न्यायाधीशहरु नियुक्त गर्न सक्ने र उनले तिनीहरुलाई अमेरिकी संविधानको दोस्रो संशोधन खारेजीका लागि प्रयोग गर्नसक्ने बताए।

दोस्रो संशोधनले हतियार राख्न सकिने अधिकार स्थापित गरेको छ।

धम्की

केहीले यसलाई, ट्रम्पले बन्दुक धनीहरुलाई न्यायाधीश वा क्लिन्टनविरुद्ध हतियार प्रयोग गर्न उक्साएको रुपमा व्याख्या गरेका छन्।

क्लिन्टनको चुनावी प्रचारप्रसारमा लागेकाहरुले ट्रम्पको उक्त भनाइ खतरनाक भएको भन्दै निन्दा गरेका छन्।

तर ट्रम्पले त्यस्तो अभिव्यक्ति दिएर हिंसा भड्काउन खोजेको भन्ने विषयलाई उनका प्रवक्ताले अस्वीकार गरेका छन्।

डेमोक्र्याटिक सिनेटर क्रिश मर्फीले भनेका छन्, ट्रम्पको उक्त आह्वान हत्याको धम्की बराबर भएको बताए।