संदिग्ध हमलाकारीको जेलभित्रै मृत्यु

  • 13 अक्टोबर 2016
तस्वीर कपीराइट AFP
Image caption सिरियाली आप्रवासीका रुपमा अलबकर गत वर्ष जर्मनी भित्रिएका थिए।

बर्लिन विमानस्थलमा बम हमलाको योजना गरिरहेको भनिएका एक संदिग्ध पुरुष जर्मनीको लाइपजिग शहरस्थित एक जेलमा मृत अवस्थामा फेला परेको अधिकारीहरुले बताएका छन्।

जाबर अलबकरले आफ्नै ज्यान लिएको र घटनाबारे थप अनुसन्धान थालिएको स्याक्सनी राज्यको न्याय मन्त्रालयले जनाएको छ।

जर्मन प्रहरीले सिरियाली आप्रवासी ती व्यक्तिमाथि महिनौंदेखि निगरानी गरिरहेका थिए।

तर शनिबार उनको कोठामा पुग्दा उनी पक्राउ पर्न सकेनन्।

दुई दिन देखि फरार रहेका उनलाई तीनजना सिरियाली आप्रवासीहरुको समूहले नै प्रहरीसमक्ष बुझाइदिएको थियो।

२२ वर्षीय अलबकर पक्राउ परेपछि जेलमा भोक हडताल गरिरहेका थिए। डेर स्पिगल न्यूज वेबसाइटका अनुसार जेलभित्रपनि उनी चौबिसै घण्टा कडा निगरानीमा थिए।

शरण

गत वर्ष जर्मनी छिरेका उनलाई त्यहाँ शरण दिइएको थियो।

तस्वीर कपीराइट AFP
Image caption अलबकरको कोठाबाट विष्फोटक पदार्थ फेला परेको बताइएको छ।

जर्मनीको जासुसी संस्थालाई उनले हमलाको योजना बनाइरहेको भन्ने सूचना गत साता प्राप्त भएको थियो।

त्यसपछि स्याक्सनी राज्यको प्रहरीलाई सतर्क गराइएको थियो।

अधिकारीहरुका अनुसार उनले इन्टरनेटमार्फत बम बनाउने तरीकाबारे जानकारी हासिल गरेको पत्ता लागेको छ। साथै उनले विष्फोटक पदार्थसमेत जम्मा पारेको बताइएको छ।

उनको कोठाबाट प्रहरीले डेढ किलो टिएटिपी भनिने घरेलु विष्फोटक पदार्थ फेला पारेको थियो। सो सामाग्री गत वर्ष प्यारीसमा र गत मार्च महिनामा ब्रसल्समा गरिएका घातक जिहादी हमलामा प्रयोग गरिएका थिए।

बर्लिनस्थित बीबीसीका सम्वाददाता भन्छन् उनको मृत्युले प्रहरीलाई उनका योजना तथा सहयोगीहरुबारे जान्न कठिन बनाइदिएको छ।