‘मध्य अफ्रिकी गणतन्त्रमा हिंसा बढ्दो’

  • 29 अक्टोबर 2016

मध्य अफ्रिकी गणतन्त्रस्थित संयुक्त राष्ट्रसंघका शान्तिस्थापक सेनाले त्यहाँ दुई दिनयता २५ जनाको मृत्यु भएपछि बढ्दो हिंसाको सामना गर्न मुश्किल परेको बताएका छन्।

मुसलमान बाहुल्यता रहेको एउटा विद्रोही समूहले तीन वर्षभन्दा अघि राष्ट्रपतिलाई पदच्यूत गरेपछि त्यहाँ द्वन्द्व शुरु भएको हो।

दुई दिनदेखि जारी हिंसामा परेर २५ जना मारिएको संयुक्त राष्ट्रसंघको शान्ति मिसनले बताएको छ।

बिहीबार पूर्व सेलेका लडाकु र ईसाई भिजिलान्तेहरुको बलाका विरोधी समूहबीच भएको भिडन्तमा १५ जना मारिएको उक्त मिसनले जनाएको छ।

द्वन्द्व

शुक्रबार एउटा धरापमा परेर ६ जना प्रहरी अधिकारी र ४ जना सर्वसाधारण मारिएका थिए।

सन् २०१३ यता मध्य अफ्रिकी गणतन्त्रमा धार्मिक तथा जातीय द्वन्द्वहरु भइरहेका छन्।

तस्वीर कपीराइट no credit

केही राजनीतिज्ञले लडाकुहरुलाई आक्रमण गर्न प्रोत्साहित गरिरहेका खबर प्राप्त भएका छन्।

बम्बारी नगरभित्र र वरपर ईसाई तथा मुसलमान लडाकुबीच भिडन्त भएको छ र स्थानीय प्रहरी र राष्ट्रसंघका शान्तिसेनामाथि पनि आक्रमण भएका छन्।

शनिबार एउटा वक्तव्य जारी गर्दै माइनस्का मिसनले राजधानी बांगुईभन्दा करिब २५० किलोमिटर उत्तरपुर्वमा बलाका विरोधी र पूर्व सेलेका समूहबीच भएका भिडन्तमा १५ जना मारिएको र थुप्रै घाइते भएको बताएको थियो।

सिलसिला

राष्ट्रसंघको मिशनले सबै पक्षलाई आक्रमण र प्रत्याक्रमणको सिलसिला अन्त्य गर्न आह्वान गरेको छ।

सन् २०१३ मा सेलेका विद्रोहीहरुले ईसाई राष्ट्रपति फ्राँस्वा बोजिजेलाई पदच्यूत गरेर छोटो समयका लागि सत्ता हत्याएका थिए।

त्यसपछि सेलेका समूहलाई पनि सत्ताबाट हटाईयो, जसका कारण ईसाई बलाका विरोधी लडाकुको मुसलमान समुदायविरुद्ध हिंसात्मक प्रत्याक्रमण शुरु भयो।

सन् २०१३ यता मध्य अफ्रिकी गणतन्त्रमा हजारौं मारिएका छन् र लाखौं विस्थापित भएका छन्।

त्यहाँ १२ हजारभन्दा बढी संयुक्त राष्ट्रसंघका शान्ति स्थापकहरु खटिएका छन्।