پاکستان: د عمران خان خبرې ناسمې تعبیر شوې

د پاکستان د بهرنیو چارو وزارت وايي، د افغانستان په تړاو د دغه هېواد د لومړي وزیر عمران خان وروستۍ څرګندونې رسنیو ناسمې راخیستې دي.

تېره ورځ ځايي رسنیو د عمران خان له خولې لیکلي وو، چې افغانستان کې لنډمهالی حکومت غواړي.

دې خبرې ته پر افغان حکومت او سیاستوالو سربېره د افغان سولې لپاره د امریکا ځانګړي استازي زلمي خلیلزاد هم غبرګون کې وویل، چې دا څرګندونې د سولې هڅو لپاره رغنده نه دي.

خو د پاکستان د بهرنیو چارو وزارت د عمران خان مطلب د پاکستان په څېر ټاکنو لپاره افغانستان کې د لنډمهالي حکومت جوړېدو خبره کړې ده.

دا خبرې باید د افغانستان کورنیو چارو کې د لاسوهنې په مانا ونه بلل شي.

د پاکستان د بهرنیو چارو وزارت اعلامیه کې دا هم راغلي چې دغه هېواد افغانستان کې د افغانانو په مشرۍ او ملکیت د سیاسي پروسې پرته کومه بله ګټه نه لټوي.

د عمران خان له پرونیو څرګندونو وروسته د افغانستان بهرنیو چارو وزارت په کابل کې د پاکستاني سفیر مرستیال احضار کړ.

دې سره هممهاله افغان چارواکو په اسلام اباد کې د افغانستان سفیر 'د نور بحث ' لپاره کابل ته وغوښت.

د افغان سولې خبرو لپاره د امریکا متحدو ایالتونو بهرنیو چارو وزارت ځانګړی استازي زلمی خلیلزاد هم وویل، د افغانستان سولې بهیر کې د پاکستان رول رغنده و، خو د لومړي وزیر عمران خان څرګندونې رغنده نه وې.