کربلا: د عاشورا مراسمو ټېل ماټېل کې ۳۱ کسان وژل شوي

  • 10 سپتمبر 2019 - 19 وږی 1398
کربلا د انځور حقوق Getty Images

د عراق په کربلا ښار کې د عاشورا ورځې مراسمو کې د ګډوډۍ او ټېل ماټېل پایله کې ۳۱ کسان وژل شوي او نژدې ۱۰۰ ټپیان دي. د رویټرز خبرې اژانس رپوټ کې د عراق عامې روغتیا چارواکو له قوله ویل شوي چې پېښه د عاشورا مراسمو کې د ټېل ماټېل رامنځته کېدو له کبله شوې ده.

کربلا کې روغتیاپالانو، مرستندویه کارکوونکو او امنیتي چارواکو رویټرز ته ویلي، په مراسمو کې د خلکو ګڼې ګوڼې له کبله د وژل شویو کسانو د شمېر ډېرېدو اندېښنه شته.

عراق کې چاودنو ۴۰ شیعه زیارت کوونکي وژلي

عراق: بصره کې چاودنو ۳۰ شیعه زیارت کوونکي ووژل

د انادولو خبري اژانس په رپوټ کې بیا د یوه امنیتي چارواکي له قوله چې نه غواړي نوم یې یاد شي ویل شوي چې پېښه د مراسمو لپاره د یوه چمتو شوي دهلیز غورځېدو له کبله شوې ده.

یوه عراقي خبریال سیف صلاح الهیتي هم په ټویټر پیغام کې د پېښې لامل د دهلیز غورځېدل بللي دي.

د عاشورا پر ورځ د نړۍ ډېرو هېوادونو کې ویرجن خلک د اسلام د پيغمبر (ص) د لمسي امام حسین او د هغه د خپلوانو او ملګرو د شهادت تلین په مناسبت ویر کوي.

د محرم پر لسمه له عراق، ایران او نورو هېوادونو ګڼ شیعه ګان د عاشورا مراسمو لپاره کربلا ته ځي. کربلا کې هر کال سلګونه زره کسان دې مراسمو کې ګډون کوي.

اړونده مطالب