د ملګرو ملتونو امنیت شورا د افغان جګړې پای ته رسېدو غوښتنه وکړه

  • سمیع الله موسی‌زی
  • بي بي سي، لندن
هرات

د عکس سرچینه، HERAT.GOV

د عکس تشریح،

د هرات ښار ځینې سیمو کې د طالپانو او حکومت جګړه.

د ملګرو ملتونو امنیت شورا د افغانستان په اړه په تازه بیان کې ټینګار کړی چې امنیت شورا يو ځل بیا پر خپل پخواني دریځ ټېنګار کوي او افغانستان کې د امارت په نوم د سیاسي جوړښت د بیا رامنځته کېدو پلوي نه ده.

دې بیان کې ویل شوي د امنیت شورا غړي د طالبانو د بریدونو په پایله کې په افغانستان کې پر پراخ تاوتریخوالي ژوره اندېښنه لري او غوښتنه کوي چې ژر تر ژره باید تاوتریخوالی کم شي.

په تېرو څو اونیو کې د افغانستان د څو مهمو ښارونو په څنډو او ځینو برخو کې د طالبانو بریدونه پراخ شوي او له افغان ځواکونو سره په جګړه کې ښکېل دي.

د ملګرو ملتونو امنیت شورا د دې جګړو پرمهال پر بشري حقونو تیري او دې برخه کې سرغړونې ته په اشارې ویلي چې د شورا غړې په دې اړه رپوټونو په ژوره توګه خواشیني کړي دي.

د افغانستان د بشري حقونو خپلواک کمیسیون ویلي طالبانو د کندهار په سپين بولدک ولسوالۍ کې یو شمیر پخواني او اوسني حکومتي کارکوونکي له کورونو اېستلي او وژلي دي.

د غزني په مالستان ولسوالۍ کې چې هغه هم طالبانو نیولې د شاوخوا څلویښتو ملکي وګړو د وژلو رپوټونه ورکړل شوي دي.

طالبانو په دواړو وژنو کې لاس لرل رد کړي خو د امریکا سفارت دا وژنې احتمالي جنګي جرم بللی.

امنیت شورا ویلي د جګړې لوري باید د نړیوالو بشري قوانینو له مخې د ولسي وګړو ژوند ته پام وکړي. ټېنګار یې کړی چې افغان دولت او طالبان دې د یوې سیاسي روغې جوړې لپاره په جدي توګه د سولې بهیر کې شامل شي د سولې خبرې چټکې او اوربند وشي.

د امنیت شورا غړو پر داسې روغه جوړه ټېنګار کړی چې د ښځو بشپړ، مساوي او معنا لرونکی ګډون تضمین کړي.

له امنیت شورا غوښتنه

د عکس سرچینه، MOF

د عکس تشریح،

حنیف اتمر له هندي سیال سره خبرو کې د امنیت شورا غونډې غوښتنه کړې ده.

بل لورته افغان دولت له امنیت شورا غوښتنه کړې چې دغه شورا د ا فغانستان په اړه بیړنۍ غونډه وکړي.

هند اوس د دې شورا مشري کوي.

د افغانستان د بهرنیو چارو وزیر محمد حنیف اتمر له خپل هندي انډول جې شنکر سره خبرو کې دا غوښتنه کړې ده.

د افغانستان بهرنیو چارو وزارت وايي، ښاغلي اتمر په افغانستان کې د بهرنیو جنګیالیو او ترهګرو ډلو سره په همغږۍ د طالبانو بریدونه جنګي جنايت او د نړیوالو بشري قوانينونه سرغړونه بللې او د دې ناورین دوام په اړه یې خبرداری ورکړ.

په خپله ښاغلي اتمر په دې اړه پرون خبریالانو ته وویل چې دا غوښتنه یې کابل کې د نړیوالې ټولنې له استازو سره هم مطرح کړې ده.

هغه زیاته کړه دوی ته یې په ډاګه وویل، نړیواله ټولنه مسوولیت لري چې د افغانانو سره ودریږي او په ټول هېواد کې په تېره ښارونو کې د دې وحشي جګړې مخه ونیسي.

ښاغلی اتمر وايي غوښتنه یې وکړه چې د ملګرو ملتونو امنیت شورا ځانګړې غونډه باید جوړه شي او د دې شورا له خوا ځانګړي اقدامات وشي.

دا غوښتنه داسې مهال کیږي چې افغانستان کې د جګړې نوې څپې زرګونه کورنۍ بې ځایه کړې او په تېرو شپږو میاشتو کې ولسي وګړو ته اوښتې مرګ ژوبله بې سارې بلل شوې ده.