کارموندنه او هستوګنځای 'د افغانستان دولت پروړاندې جدي ننګونې دي'

د انځور حقوق Naderi
Image caption د افغانستان دولت په وروستیو کلونو کې د کور جوړونې به برخه کې ډېرې هڅې کړې دي

د افغانستان د ښار جوړونې او مسکن وزیر سید سعادت منصور نادري ویلي؛ د افغانستان نفوسو ته په کتو، کارموندنه او د هستوګنځایونو برابرول ددغه هېواد له عمده ننګونو دي.

ښاغلي نادري نن چهارشنبه (عقرب/لړم ۱۲مه) کابل کې په یوه خبري ناسته کې وویل؛ د افغانستان ۴۸ سلنه وګړي تر ۱۵ کلونو کم عمر لري او د ۸۰ سلنې عمر له ۳۵ کلونو کم دی.

هغه زیاته کړه؛ اوسمهال د افغانستان دولت د کارموندنې ترڅنګ، خلکو ته په مناسبه بیه د کورونو چمتو کولو هڅه کوي.

د افغانستان د ښار جوړونې وزیر په وینا، له کلیو نه ښارونو ته د خلکو ورتګ او له بهره د افغان کډوالو بېرته هېواد ته ستنېدل لامل شوي چې د افغانستان د ښاري نفوس کچه په چټکۍ سره لوړه شي او دا ټول خلک کورونو ته اړتیا لري.

+ چين کابل کې د کورونو جوړولو لويه پروژه پيلوي

+ کابل کې د خواجه رواش ښارګوټی ګټې اخستنې ته وسپارل شو

هغه وویل؛ ددې ستونزې د حل لپاره به د افغانستان دولت د ځینو بانکونو په همکارۍ "هستوګنځایونو لپاره د پیسو صندوق" جوړ کړي.

ښاغلي نادري وویل؛ په لومړي ګام کې د افغانستان بانکونه چمتو شوي چې مشتریانو ته ۱۰ کلنو قسطونو کې پور ورکړي او د دولت هڅه دا ده چې دا موده ۳۰ کلونو ته زیاته کړي.

هغه وویل؛ که د میاشتنۍ ورکړې اندازه کمه شي، نو خلک به وکولی شي کورونه راونیسي.

د افغانستان د ښار جوړونې او مسکن وزیر وویل؛ د هستوګنځایونو د ستونزې د حل لپاره به د افغانستان دولت په ټولو ښارونو کې د کور جوړونې ملي پروګرام پلی کړي.

هغه وویل؛ د ۱۰ زرو کورونو له ډلې چې ټاکل شوې چین یې جوړ کړي، نژدې ۲۶۰۰ اپارتمانونه به یې د کابل ښار په لویدیځه څنډه دارلامان سیمه کې جوړ شي او پاتې په پام کې ده په ولایتونو کې ورغول شي.

د انځور حقوق ARG
Image caption ښاغلي نادري وویل چې دولت به د کور جوړونې یو ملي پروګرام پیل کړي

د هغه په وینا، ۱۰۰۰ نور اپارتمانونه به کابل کې د قطر لخوا جوړ شي.

ښاغلي نادري څرګنده کړه چې د افغانستان حکومت په دغه هېواد کې د کور جوړونې پروګرام پراختیا لپاره له روسیې سره د وړاندې جوړو شویو کورونو د فابریکې پر جوړولو هوکړه کړې چې د اپارتمانونو د جوړولو موده له دوو کلونو شپږو میاشتو ته راټیټوي.

+ د روسیې شرکت کابل کې کورونه جوړوي

هغه وویل؛ دولت نور پر خلکو ځمکې نه خرڅوي، بلکې دا ځمکې د خصوصي سکتور په مشارکت پر کورونو او هستوګنځایونو بدلوي.

د افغانستان د ښار جوړونې او مسکن د وزیر په وینا، د خواجه رواش په سیمه کې چې افغانستان کې د کور جوړونې ترټولو لویه پروژه بلل شوې، ۵۰ سلنه اپارتمانونه د هغوی اصلي مالکانو ته سپارل شوي دي.