زابل کې د سړک غاړې ماین چاودنې درې خبریالان ټپیان کړل

د افغانستان په سوېل کې امنیتي چارواکو ویلي؛ د سړک غاړې ماین په چاودنه کې درې خبریالان ټپیان شوي دي.

د زابل د امنیه قوماندانۍ د امنیت آمر غلام جېلاني فراهي بي بي سي ته وویل؛ ددغو خبرنګارانو موټر د جمعې په ورځ (قوس/لیندۍ ۱۲مه) د زابل په شمال کې له شهرصفا نه د بېرته ګرځېدو پرمهال په سړک کې پر ښخ کړل شوي ماین وربرابر شو.

ښاغلي فراهي زیاته کړه؛ هغوی د دولت ضد وسلوالو پروړاندې د دولتي ګډو ځواکونو د عملیاتو پوښښ لپاره د زابل شمال شهر صفا ته تللي وو.

د زابل ددغه امنیتي چارواکي په وینا، دا عملیات څلور ورځې وړاندې د پولیسو، پوځ او ملي امنیت سرتېرو پيل کړي دي.

+ زابل کې د ملي راډيو ټلويزيون خبريال وژل شوی

د زابل د امنیه قومندانۍ د امنیت آمر زیاته کړه؛ اوسمهال ددغو خبریالانو روغتیایي وضعیت د ډاډ وړ دی او د هغوی ټپونه د اندېښنې وړ نه دي.

شل ورځې وړاندې په زابل کې یو سیمه ییز خبریال د دوو کسانو لخوا چې وسلې هم ورسره وې، د چړې په ګوزارونو ټپی شوی و.

افغانستان کې د ازادو رسنیو د ملاتړ ادارې (نی) په روان کال کې په زابل کې د خبریالانو پروړاندې د تاوتریخوالي ۲۵ پېښې ثبتې کړې دي.

دغه بنسټ چې د ازادو رسنیو ملاتړی دی د روان میلادي کال په لومړیو لسو میاشتو کې د خبریالانو پروړاندې دتاوتریخوالي ۳۷۷ پېښې ثبتې کړې دي چې شمېر یې په تېرو اتو کلونو کې د خبریالانو پروړاندې د شویو نژدې ټولو تاوتریخوالو سره برابر دی.

ددغه بنست چارواکو ویلي؛ په تېرو کلونو کې په اوسط ډول د خبریالانو پروړاندې د تاوتریخوالې پېښې ۴۸ ته رسېدې، خو سږکال دا شمېره هیښوونکې ده.

دې پېښو کې بېلابېل تاوتریخوالی لکه وژنه، وهل ډبول، نیول او سپکاوی راځي.