طالبانو د خپل مشر ژوندلیک کې څه لیکلي؟

طالبان د انځور حقوق Alamy
Image caption د طالبانو مشر ملا هبت الله اخوندزاده

طالبانو د خپل نوي مشر ملا هبت الله اخوندزاده ژوند لیک ـ چې شپړ میاشتې مخکې د دې ډلې مشر غوره شوی ـ د چهارشنبې په ورځ خپور کړ.

وايي،؛ مشر يې په مجلس کې اکثرا خاموشه خو د ضرورت په وخت کې يې خبرې ډیرې موثرې او کاري وي. دوی زیاتوي: "ژوند یې ساده او بي تکلفه دی، په خوراک، څښاک. جامو او مسکن کې یې د ترفه هیڅ اثر نه لیدل کیږي".

د طالبانو په خبره، د دوی نوی مشر ملا هبت الله د شیخ مولوي محمد خان زوی او د مولانا خدای رحیم لمسی دی. د دوی په وینا، ملا هبت الله د ۱۳۸۷ هـ ق کال د رجب میاشتې په ۱۵مه نېټه د کندهار د پنجوايي ولسوالۍ په ناخوني کلي کې زېږېدلی دی.

د طالبانو لخوا چارشنبه د ډیسمبر۱۴ دغه ژوند لیک په پنځو ژبو پښتو، دري، انګلیسي، اردو او عربي کې خپور شوی او په سر کې يې کښلي: "افغانستان د یرغلګرو هدیره ، د عزت ، شهامت او ویاړونو مناره ، د اتلانو او حماسه جوړوونکو کور او د جهاد، شهادت او سرښندنې مدرسه ده".

که څه هم د طالبانو لخوا د پنځه زره تورو په دغه ژوند لیک کې د دوی د مشر ملا هبت الله د روسیې ضد جنګېدو ذکر شته او هغه يې نه یوازې د مجاهدینو په وخت کې یو ښه فعال جهادي بللی، بلکې د ناټو ځواکونو ضد يې هم د دوی په ټکیو "د یرغلګرو پر ضد جګړې ته هېوادوال سنګرونو ته رابلل".

د انځور حقوق Reuters
Image caption د طالبانو پخوانی مشر ملا اختر منصور

خو په دغه ژوند لیک کې يې د کچلاغ د هغې مدرسې هیڅ ذکر نشته، چې پکې نوموړي څو کاله درس ورکاوه او د ځينو سرچینو پر اساس کله چې نوموړی د ملا اختر منصور مرستیال وټاکل شو، نو ډېری وګړي ورته همدې مدرسې ته د مبارکۍ لپاره راتلل.

د سرچینو په خبره، وروسته بیا هم همدلته و، خو چې کله نوموړی د طالبانو مشر وټاکل شو، نو بیا يې دا مدرسه پرې ښوده او نامعلوم ځای ته ولاړ.

د طالبانو لخوا د خپل مشر په دغه ژوند لیک کې لیکل شوي، چې نوموړی له تیرو لسو کلونو مسلسل د نبوي حدیثونو او قران کریم د تفسیر درس ور کوي چي اوس یې په هېواد کې بی شمیره عالمان شاګردان دي.

د طالبانو مخکينی مشر ملا اختر منصور د بلوچستان له نوشکي سیمې سره څېرمه په یوه امریکايي ډرون برید کې ووژل شو، چې ور سره د نړۍ لخوا پر پاکستان هغو تورونو بیا زور واخیست، چې له مودې راهیسې يې ورباندې لګوي.

نړۍ وايي، پاکستان د طالبانو ملاتړ کوي او د هغوی مشران يې په کوټه، پېښور او قبایلي سیمو کې د کوټې شورا، پېښور شورا او میرانشا شورا په نومونو ساتلي او هر اړخیزه مرستې يې کوي، خو پاکستان او طالبان دا تورونه ردوي.