مشرانو جرګې امنیتي مسوولین عمومي غونډې ته غوښتي وو

د انځور حقوق PARLIAMENT
Image caption مشرانو جرګې امنیتي مسوولین عمومي غونډې ته بللي وو

د افغانستان مشرانو جرګې د دفاع، کورنیو چارو وزیران او د ملي امنیت ادارې مشر خپلې عمومي غونډې ته غوښتي وو.

د افغانستان مشرانو جرګه وايي، هېواد کې جګړه ډېره شوې او د اسلامي دولت یا داعش په نامه ډلې وده کړي او دغه راز د هېواد په ښارونو کې د ځانمرګي بریدونو شمېر ډېر شوی دی.

د افغانستان مشرانو جرګې ځینې غړي وايي، همدا اوس د هېواد په ۱۸ ولایتونو کې جګړه روانه ده، خو بل لور ته امنیتي چارواکي وايي، د حکومت مخالفانو ته یې د تېر کال اوږدو کې درنه مرګژوبله اړولې او هغوی نه دي توانیدلي خپلو هدفونو ته ورسېږي.

د افغانستان دفاع وزیر عبدالله حبیبي مشرانو جرګې ته وویل، د افغانستان دفاعي ځواکونه راتلونکي پسرلي کې د پراخو پوځي عملیاتو لپاره چمتووالی کوي.

نوموړي زیاته کړه، چې دوی د سږ کال ژمي اوږدو کې هم ځینو برخو کې پوځي عملیات کوي، ځینو برخو کې د بیا رغونې چارې کوي او وايي د ( دښمنانو ) ماتولو لپاره په رواني جګړه کې هم کار کوي.

سناتورانو د داعش نومي ډلې شتون او فعالیتونه هم د اندېښنې وړ وبلل او له امنیتي مسوولانو یې وغوښتل، چې د دغې ډلې د فعالیتونو مخنیوي وکړي.

د افغانستان دفاع وزیر په خبره افغان امنیتي ځواکونو د ننګرهار په ځینو برخو کې او په ځانګړې توګه په پچیراګام ولسوالۍ کې دغه ډله تر ډېره بریده ځپلې ده.

د نوموړي په وینا اوس هم د دغې ډلې خلاف عملیات روان دي. د افغانستان ملي امنیت ادارې مشر معصوم ستانکري په خبره افغانستان کې د جګړې پای ته سولو لپاره 'ملي یوالي ته اړتیا ده ' او په خبره یې باید د سیاسي ثبات لپاره هر اړخیزې هلې ځلې وشي.

د هغه په وینا، شخصي، قومي، سیمه ییزې او ژبنۍ سیالۍ د دې لامل شوې، چې سیاسي نظام ناتوانه شي او د حکومت مخالفان له دغه حالته ګټه پورته کړي.

نوموړي دغه راز هغو کسانو ته خبرداری ورکړ، چې د حکومت وسله والو مخافانو ته اسانتیاوې چمتو کوي او دغه کسان یې د وسله والو مخالفانو پرتله ډېر خطرناک وبلل.

ښاغلي ستانکزي وویل، هغه کسان، چې د حکومت وسله والو مخالفانو فعالیتونو ته زمینه برابروي، هغوی په خپلو کورنو کې پټوي او په خپلو ګاډو کې یې لېږدوي، رالېږدوي، باید د وسله والو مخالفانو پرتله سختې سزاوې وویني.

د افغانستان ملي امنیت ادارې مشر دغه راز وویل، باید په افغانستان کې د جګړې پای ته رسولو لپاره د وسله والو مخالفانو منځ کې د جګړې انګېزه بدله کړل شي او هغوي وپوهول شي، چې دغه جګړه ' جهاد ' نه دی، بلکې د بې ګناه اسنانانو وژنه ده.

له فساد سره مبارزه، د قانون پلي کول، د مشرتابه په کچه بدلونونه راوستل او محاکمې ته د هغو کسانو محامخ کول، چې له واکه ناروا ګټه اخلي نور هغه پروګرامونه وو، چې ننۍ غونډې ته غوښتل شویو مسوولانو ویل کار پرې کوي.