"د پخوانيو سيمه ييزو هرمندانو څوک پوښتنه نه کوي"

استاد ماشينی
د عکس تشریح،

عبدالرشيد سروري د کابل په وزير اکبر خان روغتون کې له درو مياشتو راهيسي بستر دی.

د افغانستان نامتو سرنده او رباب غږوونکی عبدالرشید سروري چې د استاد ماشیني په نامه پېژندل کېږي له څه مودې راهیسې سخت ناروغ دی او وايي هېچا یې غم نه دی خوړلی.

نوموړی د کابل په وزير اکبر خان روغتون کې له درو مياشتو راهيسي بستر دی.

له بي بي سي سره د خبرو پرمهال یې له سترګو اوښکې توې شوې، ویل یې کلونه یې په خپل هنر د ډېرو مجلسونه تاوده ساتل، خو اوس یې د پوښتنې څوک نشته.

عبدالرشيد سروري وايي، "څوک زما پوښتنه نه کوي، درې مياشتې کېږي دلته پروت يم، نه حکومت پوښتنه کوي او نه هم خلک."

نوموړی وايي "پيسې نه لرم چې د درملنې لپاره بهر لاړ شم. خير دی زه هم د دې خاورې يم، د دې خاورې بچی يم، د پخوانيو محلي هنرمندانو څوک پوښتنه نه کوي."

د استاد ماشيني، سترګو د ډېرو ناهیلو کیسه کوله خو وروستۍ غوښتنه یې له افغان دولته دا وه چې د ښې درملنې لپاره یې یوه بهرني هېواد ته ولېږي.

استاد ماشینی د افغانستان په لوګر ولایت کې زیږېدلی او د نامتو ولسي سندرغاړي استاد دري لوګري زوی دی.

د عکس تشریح،

استاد ماشینی د افغانستان په لوګر ولایت کې زیږېدلی او د نامتو ولسي سندرغاړي استاد دري لوګري زوی دی.

استاد ماشینې نژدې ۵۰ کاله وړاندې دې هنر ته مخه کړې. د خوښیو په ډېر شمېر شخصي مجلسونو او د ملي ټلویزون په بېلابېلو خپرونو کې یې سرنده او رباب غږولی او د خپل هنر ژوندي ساتلو لپاره یې ډېر زدکوونکي هم روزلي دي.

د وزير اکبر خان روغتون يو ډاکتر حارث وايي، ښاغلی سروري ګڼې ناروغۍ لري، د پښې له اړخه د شکر په زخم مبتلا دی بله ستونزه يې دا ده چې چوره دی. په دې اړه مو د جراحۍ له برخې سره مشوره کړې وروسته له دې چې ټپ يې ښه شي، د هغې درملنه يې هم کوو.

خو بله خوا د اطلاعاتو او کلتور وزارت چارواکي وايي، ښاغلي سروري لا تراوسه دې وزارت ته مراجعه نه ده کړې.

د دغه وزارت وياند محمد صابر مومند بي بي سي ته وويل، "موږ به د ده پوښتنه وکړو، هر هغه امکانات چې د اطلاعاتو او کلتور وزارت لري، موږ به يې له دوی درېغ نه کړو."

استاد ماشینی په افغانستان کې د ګوتو به شمېر سرنده ږغونکو کې راځي چې اوس یې عمر تر شپېتو کلونو اوښتی دی.