افغان جنرال د بډو اخيستو په تور په ۱۴ کاله بند محکوم شوی

Image caption د افغانستان د اداري فساد د لویو جرمونو پر وړاندې د مبارزې عدلي او قضایي مرکز جنرال عبدالواسع روفي په ۱۴ کاله بند محکوم کړ

د افغانستان د اداري فساد د لویو جرمونو پر وړاندې د مبارزې عدلي او قضایي مرکز د کورنیو چارو وزارت یو جنرال عبدالواسع روفي د بډو او له دندې د ناوړه ګټې اخیستنې په تور په څوارلس کاله بند محکوم کړ.

دغه جنرال د کورنیو چارو وزارت د تدارکاتو ریاست د ارزونې د کمیټې مشر و چې په کابل کې يې محاکمه په علني ډول ترسره شوه.

د محکمې په ترڅ کې ګرم کس او مدافع وکیل یې ډېره هڅه وکړه چې لګول شوي تورونه رد او بې اساسه وښيي، خو د اداري فساد د لویو جرمونو پر وړاندې د مبارزې عدلي او قضایي مرکز لومړنۍ محکمې جنرال عبدالواسع روفي ګرم وپېژانده.

"افغانستان کې خلک هرکال درې میلیارده ډالر بډې ورکوي"

''افغانستان کې سړي سر عاید دېرش سلنه زیات شوی''

"فساد یوازې افغاني ستونزه نه ده، ځینې امریکایان هم په کې ښکېل دي"

د دغې محکمې رييس شير اقا منيب دغه جنرال د ۱۵۰ زرو امريکايي ډالرو په رشوت په اته کاله بند او د رشوت په اندازې نقدي جريمې محکوم کړ.

همدارنګه عبدالواسع روفي موټر ته د جعلي اسنادو په جوړولو په پنځه کال بند او د دغو اسنادو د استفادې لپاره په يو کال او شپږو مياشتو بند محکوم شو.

د عبدالواسع روفي ټول بند ۱۴ کاله کېږي.

د کورنیو چارو وزارت دغه جنرال چې په دې وزارت کې ۳۵ کاله کاري سابقه لري په دې ګرم وپېژندل شو چې له یوې کمپنۍ څخه یې د تیلو د یوه قرار داد په بدل کې یونیم لک امریکایي ډالر اخیستي.

جنرال عبدالواسع روفي بیا په محکمه کې وویل، د ده پر وړاندې د بډې اخیستو تورونه یوه دسیسه ده ځکه چې ده د تیلو د قرار داد په ورکړه کې "اجرائي صلاحیت نه درلود."

محکمې وویل چې پر جنرال عبدالواسع روفي د دوی د محکمې حکم وروستی نه دی او نوموړی کولی شي چې د استناف غوښتنه وکړي.

دا په داسې حال کې ده چې له دې وړاندې افغان ولسمشر د کورنیو چارو وزارت درې پخواني مرستیالان د اداري فساد په تور ممنوع الخروج اعلان او لویې څارنوالۍ ته معرفي کړل.

د اداري فساد د لویو جرمونو پر وړاندې د مبارزې عدلي او قضایي مرکز له دې وړاندې د لویې څارنوالۍ یو پخوانی پوځي تورن جنرال علني محاکمه کړ.

ورته مطالب