د لاس وېګاس بريدګر کور کې د وسلو زېرمه موندل شوې

امريکا کې پلټونکي زيار باسي لاس وېګاس کې د يکشنبې (۱ اکتوبر) ډله ييزې وژنې موخې او لاملونه راوسپړي، چې ۵۹ کسان په کې ووژل شول.

لا تر اوسه داسې نښې نښانې نه دي په ګوته شوې، چې دا پېښه دې، له ترهګرۍ سره کوم تړاو ولري.

اوس روښانه شوې، له هغه راهيسې چې د بيړنيو چارو خدمتونو ته زنګ وهلی شوی، بيا هوټل کې د ټوپکوال سټيون پډوک ګوټې ته د پوليسو ورننوتو ترمهاله يو ساعت تېر شوی، چې دی يې په کې مړ موندلی و.