له امریکا وروسته هالنډ افغان روباټګرو نجونو ته مډال ور کړ

ر د انځور حقوق Getty Images

افغان روباټګرو نجونو له خپلې دودیزې ټولنې سر پورته کړ او د نورو هېوادونو په لور په دې تکل ووتې چې د افغانستان یو بل انځور نړيوالو ته وړاندې کړي.

هغوی له دې شعار سره چې (دوی کولی شي) امريکا او هالنډ ته لاړې او د روباټ جوړونې په نړيوالو سیالیو کې یې ګډون وکړ.

لیدا عزيزي د همدې شپږ کسيزې روباټ جوړوونکې ډلې یوه غړې ده چې تازه په هالنډ کې له یوې سیالۍ راګرځېدلې او د نوښتګرو ماغزو افتخاري مډال يې ګټلی دی.

* افغان نجونو د ټولې نړۍ پام ځانته واړاوه

* د افغان نجونو نیمګړی تعلیمي سفر

نوموړې وايي، دا مډال یې د افغانستان لپاره لوی ویاړ دی.

هغه غواړي په راتلوونکي کې ډرون یا بې پېلوټه الوتکه او په افغانستان کې د کرنې د عصري کولو لپاره هم ځينې روباټونه جوړ کړي.

"د راتلوونکي لپاره هم ډېر پلانونه لرو. نور روباټونه هم جوړوو او دا ځل مو پلان دی چې يوه بې پېلوټه الوتکه جوړه کړو".

د روباټ جوړوونکو ډلې روزوونکی علي رضا مهریان هم وايي، چې په راتلوونکي کې د نورو بېلا بېلو روباټونو جوړولو هوډ لري.

امریکا ته د تګ کیسه

د انځور حقوق Getty Images

دغو نجونو هغه مهال د خلکو پام ځان ته ور واړاوه چې په کابل کې د امریکا سفارت په دغه هېواد کې د روباټ جوړوونې په یوه سیالۍ کې د ګډون لپاره دوی ته له وېزې ورکولو ډډه وکړه.

خو په پراخه کچه د دې خبر په خپرېدو سره د امريکا ولسمشر ډونلډ ټرمپ هم خبر شو او دې ډلې ته يې د ويزې ورکولو امر وکړ.

دا سیالي د امریکا د ځینې پوهنتونونو او ټیکنالوجۍ مرکزونو په هڅو د روان کال د جولای ۱۶ ۱۸ روانه وه.

* افغانه؛ له کډوالۍ تر مانچسټر فوټبال لوبډلې

* د "سيسمي سټريټ" افغانه نجلۍ

په دې نړیواله سیالۍ کې د ۱۵۷ هېوادونو ۱۶۳ ډلو ګډون درلود.

د افغان روباټګرو نجونو شپږ کسیزې ډلې په دغه سیالۍ کې سلمه درجه خپله کړه.

دوی ته د مېړانې سپینو زرو مډال ور کړل شو.

د روباټ جوړوونکو نجونو شپږ کسيزه ډله له امريکا وروسته هالنډ ته لاړه او هلته يې هم پخپل لاس جوړ شوي روباټونه نندارې ته وړاندې کړل.

د انځور حقوق Getty Images
Image caption دودونه او ناامني د نجونونو د زدکړو په مخ کې خنډ بلل کېږي.

د افغان نجونو د دې ډلې له بري سره هم مهاله د انساني حقونو د څار سازمان تازه رپور ټوايي، چي په افغانستان کې درې نيم ميليونه ماشومان ښوونځي ته نه ځي چې ٨٥ سلنه يې نجونې دي.

د افغانستان په ځینو سيمو کې اوس هم نجونو ته یا له سره ښوونځي ته د تلو اجازه نه ورکول کیږي او یا هم له منځنيو زده کړو وروسته د واده او یا د نورو ټولنيزو ستونزو له کبله له درسه منع کیږي.