طالبانو په لوګر ولايت کې "ښوونځي تړلي"

لوګر
د عکس تشریح،

څرخ د لوګر ولايت یوه ناامنه ولسوالۍ ده

د افغانستان د لوګر ولايت چارواکي وايي په څرخ ولسوالۍ کې وسله والو طالبانو ټول ښوونځي تړلی دي. څرخ د لوګر یوه ناامنه ولسوالۍ ده چې ډېره برخه یې د وسله والو طالبانو تر واک لاندې ده.

د يادې ولسوالۍ یوه لوړ پوړي چارواکي د نوم ښودلو په شرط بي بي سي ته وویل، د طالبانو یوه استازي د څرخ د پوهنې ریاست ته ورلېږلی او د دغه ریاست له چارواکو یې غوښتي چې د طالبانو تر دوهم امر پورې دې په څرخ ولسوالۍ کې ټول ښوونځي وتړي.

د لوګر چارواکي وايي وسلوالو طالبانو وروسته له هغه د نوموړي ولسوالۍ ټول ښوونځي وتړل چې د افغان ځواکونو د عملیاتو په پایله کې وسله والو طالبانو ته د درنې مرګ ژوبلې تر څنګ د مولوي محمد په نوم د دغې ډلې یو قومندان هم ووژل شو.

د لوګر والي ویاند سلیم صالح بي بي سي ته وویل "طالبانو دوی ته د اوښتې مرګ ژوبلې په غبرګون کې د ولسوالۍ ٣٠ ښوونځي چې د ده په خبره شاوخوا ٢٢٠٠ هلکانو او نجونو په کې زده کړې کولې، تړلي دي".

طالبانو لا تر اوسه په دې اړه غبرګون نه دی ښودلی.

د يادونې ده چې په ټول لوګر کې دا مهال ٣٢٠ ښوونیز مرکزونه فعال دي چې څه باندې ١٥٠ زره زده کوونکي په کې په زده کړې بوخت دي.

د عکس تشریح،

په ټول لوګر کې دا مهال ٣٢٠ ښوونیز مرکزونه فعال دي چې څه باندې ١٥٠ زره زده کوونکي په کې په زده کړې بوخت دي.

بلخوا د لوګر ګاونډي پکتیا ولايت د پوهنې مشر وايي طالبانو په زرمت ولسوالۍ کې د دريو کالو راهیسې ۱۳ د نجونو ښوونځي تړلي دي چې له امله یې د دغې ولسوالۍ نژدې ۳۵۰۰ نجونې له زده کړو بې برخې کړې دي.

د پوهنې وزارت د شمېرو له مخې په ټول افغانستان ۱۰۷۰ ښوونځي د زده کوونکو پر مخ تړلي دي، د دغه وزارت په وینا درې نیم میلیونه ماشومان د بېلا بېلو لاملونه له امله له زده کړو بې برخې دي.

ولسمشر محمد اشرف غني ۱۳۹۷ د پوهني کال نومولی دی. ښاغلي غني د نوي ښوونیز کال د پیل په مراسمو کې ژمنه کړې وه چې په راتلونکو دوو کلونو کې به شپږ زره نوې ښوونځي جوړ کړي.