"د سولې غوښتنه د وسلوالو طالبانو د تسلیمېدو په مانا نه ده"

خلیلي
د عکس تشریح،

ښاغلی خلیلي د سه شنبې پر ورځ د یو شمېر نورو لوړپوړو چارواکو سره یو ځای کندهار ته تللی.

د سولې د عالي شورا مشر محمد کریم خلیلي په کندهار کي د سویلي زون د دیني عالمانو او مخورو کسانو یوې لویې غونډې ته د وینا پر مهال وویل، د سولې غوښتنه د وسلوالو طالبانو د تسلیمېدو په مانا نه ده.

ښاغلی خلیلي د سه شنبې پر ورځ د یو شمېر نورو لوړپوړو چارواکو سره یو ځای کندهار ته راغلي و، او د سفر موخه یې د سویلي ولایتونو د مشرانو څخه د سولې د راوستلو په برخه کې د مرستې او مشورو غوښتنه وه.

ښاغلي خلیلي د خپلې وینا په یوه برخه کي وویل "نن هغې خاورې ته راغلي یو، چې د افغانستان د بنسټ ډبره پکې ايښودل شوې او غواړو د سولې د بنسټ ډبره هم کېښږدو."

د افغانستان د سولې د عالي شورا دغه لوړ پوړي چارواکي یو ځل بیا له وسلوالو طالبانو وغوښتل، چې د ولسمشر غني وروستيو وړاندیزونو ته مثبت ځواب ووایي او د سولې له وروستیو فرصتونو دې ګټه واخلي.

د سولې د عالي شورا د دارالاانشاء مشر اکرم خپلواک غونډې ته د وینا پر مهال وویل ، مرکزي حکومت او د سولې دعالي شورا د سولې په راوستو لپاره د کندهار له خلکو ډېره تمه کوي.

ښاغلي خپلواک وویل د طالبانو د تحریک مهم مشران د همدې سیمې د پخوانیو جهادي مشرانو سره ملګري پاتې شوي او یا هم په دې سیمه کې خپلوۍ لري او ځینې بیا په فردي توګه اړیکي لري.

د خپلواک په خبره دغه اړیکې به د سولې راوستلو په لار کې تر نورو ټولو لارو اغیزمنې او د افغانانو په ګټه وي.

نوموړي له وسلوالو طالبانو وغوښتل، افغانان دې نه اړباسي چې د دوی په استازیتوب له بل چا سره خبرې وکړي او طالبان هم باید خپل اختیار بل ته ورنکړي.

اکرم خپلواک د هلمند وروستي پرلت او د سولې خوځښت ته په اشارې سره وویل" که طالب ابرو مندې سولې ته غاړه کېنږدي ولسي پاڅون را روان دی او هیڅوک یې نشي درولای، د دې پاڅون امتیاز باید هیڅوک وانخلي دا د خلکو پاڅون دی او د دې لمنه به پراخیږي، ځکه خلک سوله غواړي."

نوموړي زیاته کړه چې په دواړو خواوو کې ځینې داسې محدودې کړۍ شته، چې سوله نه غواړي او پر وړاندې یې ستونزې جوړوي.

د عکس تشریح،

دغه غونډې ته د کندهار د عماو تر څنګ د ارزګان، هلمند او زابل دیني عالمان او مخور مشران هم ورغوښتل شوي وو.

دغه غونډې ته د کندهار د عماو تر څنګ د ارزګان، هلمند او زابل دیني عالمان او مخور مشران هم ورغوښتل شوي وو.

دیني عالمانو د ویناو پر مهال روانه جګړه پر افغانانو د بهرنیو هېوادونو لخوا تپل شوې جګړه وبلله او له افغان حکومت او د سولې له عالي شورا یې وغوښتل، چې د سولې په راوستو کي رېښتیني ګامونه واخلي.