"جوزجان کې د داعش مهم قومندان وژل شوی"

قاري حکمت

د عکس سرچینه، ANA

د عکس تشریح،

د ۲۰۰۹ شاهین قول اردو د قاري حکمت دا عکس خپور کړی

د افغانستان په شمال کې ځايي سرچینو منلې چې په جوزجان ولایت کې د اسلامي دولت یا داعش ډلې یو مهم قومندان قاري حکمت غیور له خپلو دوه ساتونکو او دوه بهرنيو وګړو سره یو ځای د ناتو ځواکونو په هوايي برید کې وژل شوی دی.

د افغان پوځ ۲۰۹ شاهین قول اردو مطبوعاتي دفتر ویلي، دا برید د پنجشنبې پر ورځ غرمه ۱۲ بجې د درزاب ولسوالۍ په سردره سیمه کې شوی.

د افغان ځواکونو مطبوعاتي دفتر همدا رنګه زیاته کړې چې د بلخ د شولګرې ولسوالۍ اوسیدونکی مولوي حبیب الرحمن د قاري حکمت پر ځای په جوزجان ولایت کې د داعش ډلې د قومندان په توګه ګمارل شوی.

د جوزجان ولایت د پولیسو د امنیت مسول عبدالحفیظ هم له بي بي سي سره په خبرو کې د قاري حکمت د وژل کېدو پخلی وکړ.

نوموړي د دوه تنو بهرنیانو د هویت په هکله څه ونه ویل، خو زیاته یې کړه چې قاري حکمت د جوزجان ولایت د درزاب ولسوالۍ د اولقای سیمې اوسیدونکی و.

د هغه په خبره قاري حکمت له داعش مخکې د طالبانو د ډلې غړی و.

د درزاب ولسوالۍ د افغانستان په شمال کې د داعش ډلې یو مهم پټنځای بلل کېږي.

څه کم درې میاشتې مخکې هم د جوزجان ولایت ځايي سرچینو منلې وه چې د امریکایي ځواکونو بي -۵۲ الوتکې په دې ولسوالۍ کې د داعش ډلې یو پټنځای له منځه وړی.

ویل کېږي چې په هغه برید کې د داعش دلې ۲۵ غړي وژل شوي وو.